Oqý jyly barysynda jaýyngerlik daıarlyq boıynsha shamamen 60 myń is-shara ótkizildi, olardyń 17 myńnan astamy túngi jaǵdaılarda uıymdastyryldy. Is-sharalardyń negizgi bóligi Qurlyq áskerleri men Desanttyq-shabýyldaý áskerleriniń úlesine tıesili boldy.
Áýe qorǵanysy kúshteri Áskerı-áýe kúshteriniń ushqysh quramyn daıarlaý deńgeıiniń oń serpini atap ótiledi. Jyl ishinde kúndizgi jáne túngi ýaqytta shamamen myń ushý aýysymy oryndaldy. Áýe áskerleriniń túrli tektegi ekıpajdary ushqyshtyq tehnıkasyn jetildirý, kúrdeli meteorologııalyq jaǵdaılarda oqý-jaýyngerlik mindetterdi oryndaý, sondaı-aq jer ústi jáne áýe nysandaryna qarsy jaýyngerlik qoldaný boıynsha jattyǵýlardy kezeń-kezeńimen pysyqtady.
Áýe shabýylyna qarsy qorǵanys áskerleriniń bólimsheleri men áskerı bólimderinde 760 jaýyngerlik úılestirý is-sharasy ótkizildi. Áskerı-teńiz kúshterinde esepti kezeńde 188 ret teńizge shyǵý júzege asyrylyp, keme ekıpajdarynyń jalpy júzý qashyqtyǵy 25 myń teńiz mılinen asty.
Qarýly Kúshterdiń túrleri, ásker tekteri men arnaıy áskerler bólimshelerin úılestirýdiń qorytyndy kezeńderinde shamamen 4,5 myń jaýyngerlik atys pen taktıkalyq oqý-jattyǵý ótkizildi. Is-sharalar barysynda ártúrli jaǵdaılarda oqý-jaýyngerlik mindetterdi tikeleı oryndaý máseleleri arnalymyna sáıkes pysyqtaldy.
Sonymen qatar jyl ishinde «Aıbalta», «Desant», «Jaýyngerlik dostastyq», «Kaspıı brızi» syndy iri jedel-strategııalyq, jedel-taktıkalyq jáne arnaıy oqý-jattyǵýlar ótti. Olardyń aıasynda Qarýly Kúshterdiń túrleri men ásker tekteriniń bólimsheleriniń ózara is-qımyly pysyqtalyp, sońǵy jyldardaǵy áskerı qaqtyǵystar tájirıbesin taldaý negizinde ázirlengen bólimshelerdi qoldanýdyń jańa nysandary men taktıkalyq tásilderi synaqtan ótkizildi. Bul jumys júıeli túrde júrgizilýde.
