Qala ákiminiń orynbasary Meıirjan Muqasovtyń pikirinshe, máslıhat sessııasynda keıbir kósheler men ótkelderge erlikpen qaza tapqan erlerdiń esimin berý týraly sheshim qabyldanǵan.
«Ár óńirde erligi umytylmas eren uldar kezdesedi. Osyndaı esimderi el esinde saqtalýy tıis birtýar perzentterimizdi jas urpaq bilýi qajet. Máselen, «Samal» shaǵyn aýdanyndaǵy №2 ótkel Atyraý oblysynyń Qurmetti azamaty, maıdanger Orynǵalı Qarasaevtyń atymen atalǵan kóshege aınaldy. Ol Qıyr Shyǵysta 13-teńiz atqyshtar brıgadasynyń tank polkinde qyzmet etken. Qanquıly soǵystan keıin týǵan jerine tek 1947 jyly oraldy. Keńes dáýirinde oblystyq deńgeıde basshylyq qyzmetter atqaryp, 20 jyldan astam ýaqyt oblystyq ardagerler keńesin basqardy.
Al Lýgovaıa kóshesine Halyq qaharmany Hıýaz Dospanovanyń esimi berildi. Uzyndyǵy shamamen bir shaqyrymǵa jýyq kóshe «Avangard» turǵyn alabynyń 2 jáne 4-shaǵyn aýdanynyń arasymen ótip, «Mereı» bazarynan Otbasylyq saıabaq pen Jeńis saıabaǵyna qaraı sozylyp jatyr. Buǵan deıin Hıýaz Dospanovanyń esimi «SMP-163» shaǵyn aýdanyndaǵy kóshelerdiń birine berilgen bolatyn. Endi bul kóshe «Narkesken» dep ataldy», dep habarlady Meıirjan Muqasov.
Ákim orynbasarynyń deregine súıensek, №14 jáne 15-ótkelge qyzmettik mindetin atqarý kezinde qaza tapqan eki polısııa qyzmetkeriniń esimi berilgen. Endi bul ótkelder ataýy bar kóshege aınaldy.
«Máselen, Shalqar Aqymǵalıev jol-patrýldik polısııa batalonynda qyzmet atqarǵan. 2019 jyly Jaıyq ózenine batyp bara jatqan qyzdy qutqarý kezinde qaza tapty. Al, kishi serjant Nurbergen О́temisov kezekshilik kezinde qýdalaýdan qashyp bara jatqan quqyq buzýshynyń kóligin toqtatpaq bolǵan. Sol kezde avtokólik qaǵyp ketip, alǵan jaraqattarynyń saldarynan kóz jumdy», dep málim etti Meıirjan Muqasov.
