Aýqymdy is-shara naýryzda Aqtóbe qalasynda ótken jalpyhalyqtyq senbilikten bastaldy. Bul kúni oblystyq jastar resýrstyq ortalyǵynyń bastamasymen eki myńǵa jýyq jas kósheler men saıabaqtarda tazalyq jumystaryn júrgizdi.
Jyl boıy turǵyndar áleýmettik jeliler men resmı mekemelerdiń ınternet paraqshalarynda jarııalanǵan habarlandyrýlar arqyly josparlanǵan tazalyq sharalaryna jınalyp otyrdy. Jalpyhalyqtyq aksııaǵa oblystyń on eki aýdany men oblys ortalyǵynan 395 myń turǵyn, 7 399 mekeme men kásiporyn qatysty. Judyryqtaı jumylǵan sharýanyń arqasynda 97 925 aýla, 1 481 áleýmettik nysan qoqystan tazartylyp, 289 saıabaq pen gúlzar retke keltirildi, 333 902 túp aǵash, 6 415 buta egildi. Qatty turmystyq qaldyq polıgonyna 68 684 tonna qoqys shyǵaryldy. Toǵaılar men qala syrtyndaǵy demalys oryndaryn tazalaý sharalaryna 5 786 tehnıka tartyldy. Aǵash kóshetterin otyrǵyzý jumysyna óńirdegi toǵyz orman sharýashylyǵy mekemesiniń mamandary jumyldyryldy. Olarǵa mektep oqýshylary, kolledj, JOO stýdentteri kómekke keldi.
Tazalyq, kógaldandyrý jumystary ár aýdannyń ereksheligine saı, túrli baǵytta uıymdastyryldy. Máselen, Baıǵanın aýdany Qaraýylkeldi aýylynyń janyndaǵy bulaq kózin arshý, onyń aınalasyn abattandyrý erekshe qurmettelgen bastama retinde baǵalanady. Aıta keterlik jaıt, «Móldir bulaqty» tazalaýǵa baıǵanındikter jyl saıyn sáýir aıynda yqylaspen kirisedi. Bul shara erterektegi aqsaqaldardyń ózen, kól, bulaq aınalasyn taza ustap, maldyń beı-bereketsiz sýatyna aınaldyrmaıtyn ónegesin qaıta tiriltkendeı boldy.
Osyndaı jumystar Oıyl, Yrǵyz, Shalqar aýdandarynda da jalǵasyn taýyp keledi. Úsh aýdannyń turǵyndary Oıyl, Yrǵyz, Shalqar ózenderiniń jaǵalaýlaryn taza ustap, tal-buta egýdi jaqsy dástúrge aınaldyrdy. Balalar jazǵy kanıkýl kezinde kóktemde ózderi otyrǵyzǵan aǵashtardy sýaryp, kútip-baptaý arqyly bir jaǵynan eńbekke tárbıelense, ekinshi jaǵynan qorshaǵan ortaǵa, jasyl tabıǵatqa janashyrlyqpen qaraý sezimderin boıyna sińire bildi. О́skeleń urpaq eresekterdiń tazalyq aksııasyna belsene qatysqan is-áreketterinen taǵylym alady. Kózben kórgenderin kóńilderine túıgen balalar tazalyq jeke basyńdy kútip baptaý emes, qorshaǵan ortaǵa janashyrlyqpen qaraý ekenin uǵynady. Tazalyq mádenıeti osydan bastaý alady.
Nazar aýdararlyq jaıt, keıingi ýaqytta qaladaǵy gúlzarlar men saıabaqtarda beı-bereket qoqys shashylyp jatpaıtyn boldy. Soǵan qaraǵanda, jalpyhalyqtyq is-shara nátıjesin berdi. Tazalyq adamdy jınaqylyqqa, tártipke úıretedi. Tártip ishki mádenıetti bıiktetedi. Zańdy syılap, kópshilik oryndarda ózderin durys ustaı biletin jandar qatary kóbeıgen saıyn qoǵam da jaqsy baǵytqa qaraı ózgeredi. Osy oraıda, tártipti el, mádenıetti ult ıdeıasy sheńberinde bastaý alǵan «Taza Qazaqstan» aksııasy qoǵamdyq sanany sáýlelendirýge jaqsy bastama bolǵany anyq.
Aqtóbe oblysy
