Partııa • 25 Jeltoqsan, 2025

Dáıekti reformaǵa senim zor

50 ret

kórsetildi

3 mın

oqý úshin

Elimiz bir palataly Parlamentke kóshken jaǵdaıda depýtattar partııalyq tizim boıynsha saılanǵan jón dep esepteıdi sarapshylar. О́ıtkeni bul júıe kishigirim elderde nemese ýnıtarly memleketterde jıi kezdesedi. Al halyqtyń eldegi saıası partııalarǵa degen kózqarasy men senimi qandaı? Jalpy partııalardy bile me? Eýrazııalyq ıntegrasııa ınstıtýtynyń júrgizgen zertteýine sáıkes, el turǵyndarynyń basym bóligi «Amanat» partııasyn ataǵan.

Gúlnar JOLJAN

Infografıkany jasaǵan – Záýresh SMAǴUL ,«EQ»

Eýrazııalyq ıntegrasııa ınstıtýtynyń ǵylymı-teorııalyq taldaý jáne ádistemelik qamtamasyz etý departamentiniń meńgerýshisi Arman Eshmuratovtyń aıtýynsha, ınstıtýt sondaı-aq azamattardyń eldiń qoǵamdyq-saıası kún tártibine, BAQ-ty tutyný arnalaryna, aqparat kózderine senim deńgeıine, olardyń qoǵamdyq-saıası jáne ekonomıkalyq jaǵdaıǵa bergen baǵasyna, Memleket basshysynyń reıtıngi men qyzmetine de zertteý júrgizgen.

Saýalnamaǵa qatysqandardyń 78,5 paıyzy keıingi úsh aıda Prezıdenttiń jumysy tıimdi bolǵanyn atap ótken. Al «Eger jaqyn aralyqta Prezıdent saılaýy bola qalsa, Qasym-Jomart Toqaevtyń kandıdatýrasyna daýys beresiz be?» degen saýalǵa qatysýshylardyń 77,3 paıyzy «ıá» dep jaýap bergen. 71,5 paıyzy aldaǵy ýaqytta elde jaqsy ózgerister bolatynyna senim bildirgen.

Eldegi saıası partııalardyń ishinen «Amanat» partııasyn 62,4 paıyz qatysýshy atap ótken. Odan soń halyq «Aq jol» (29,7 paıyz) men «Aýyl» (29,3 paıyz) partııalarymen jaqsy tanys. Al respondentterdiń 17 paıyzy Qazaqstan Halyq partııasyn, 15,1 paıyzy «Respublica» partııasyn, 11,7 paıyzy «Baıtaq» partııasyn biletinin aıtqan. Jalpyulttyq sosıal-demokratııalyq partııasyn qatysýshylardyń 10,3 paıyzy ǵana belgilegen.

«Saýalnamany biz osy jyldyń 1-10 qarasha aralyǵynda júrgizdik. 17 aýdan men respýblıkalyq mańyzy bar 3 qalanyń 18 jastan asqan 1 467 azamaty qatysty. Olar – qala men aýyl turǵyndary. Jalpy zertteýge qatysýshylardyń 52 paıyzy eldiń saıası, ekonomıkalyq jaǵdaıyn qadaǵalap otyratynyn aıtady», deıdi A.Eshmuratov.

Zertteýge súıensek, eldegi jańalyqtardy turǵyndardyń basym bóligi (52,7 paıyz) teledıdardan kóredi. Budan soń áleýmettik jelilerdegi (Instagram – 51,2 paıyz, TikTok – 39,7 paıyz, YouTube – 26,7 paıyz) aqparattarǵa kóz júgirtedi. Sondaı-aq respondentterdiń 33,5 paıyzy WhatsApp messendjeri arqyly, 29,7 paıyzy ınternet resýrstary men aqparattyq agenttikterdiń jańalyqtaryn qaraıdy. Al olardyń 19,4 paıyzy jańalyqtardy otbasy músheleri men týystarynan, 18,7 paıyzy áriptes, dos, kórshilerinen estıtinin aıtady. Dese de, halyq memlekettik BAQ-qa senim bildirgen. Zertteý turǵyndardyń aqparattyq ınternet-portaldaryna sene bermeıtinin kórsetti.

Oblystardaǵy qoǵamdyq-saıası, ekonomıkalyq jaǵdaıdy qatysýshylar turaqty dep baǵalaǵan. Osylaısha 66 paıyz respondent el durys baǵytta damyp jatqanyn aıtqan.