Baýyrjan esimi elimizdiń Qarýly kúshterinde aıryqsha oryn alady. Bul, eń aldymen, aty ańyzǵa aınalǵan qolbasshy, Keńes Odaǵynyń Batyry, jazýshy ári oıshyl Baýyrjan Momyshulynyń ómir jolymen tikeleı baılanysty. Onyń taǵylymǵa toly ǵumyry men maıdandaǵy tájirıbesi Otan qorǵaýshylardyń talaı býynyna rýhanı baǵdar boldy. Al tártip, jaýapkershilik pen otansúıgishtikke negizdelgen qaǵıdattary búgingi kúnge deıin ózektiligin joǵaltqan joq.
Almaty qalasyndaǵy Ulttyq ulannyń 5571 áskerı bólimine Keńes Odaǵynyń Batyry, Halyq qaharmany, gvardııa polkovnıgi Baýyrjan Momyshulynyń esimi berilgen. Jeke quram úshin bul zor mártebe ǵana emes, sonymen qatar áskerı-qyzmettik mindetterdi oryndaý barysynda kásibılik, tabandylyq pen adaldyq tanytyp, uly batyrdyń atyna laıyq bolý qajettigin eske salatyn joǵary jaýapkershilik.
«Baýyrjan Momyshuly men úshin erlik pen tártiptiń, shynaıy patrıotızmniń jarqyn beınesi. Onyń esimi maǵan erekshe jaýapkershilik júkteıdi. Bul meni ańyzǵa aınalǵan batyrdyń dańqty jolyn laıyqty jalǵastyrýǵa mindetteıdi. Ulttyq ulan qatarynda qyzmet etý – men úshin úlken abyroı. Negizgi maqsatym – áskerı antqa adal bolyp, elimizdiń azamattarynyń tynyshtyǵy men qaýipsizdigin qamtamasyz etý», deıdi 5517 áskerı bóliminiń merzimdi qyzmettegi sarbazy qatardaǵy Baýyrjan Tólemaǵamet.
Aty ańyzǵa aınalǵan qolbasshynyń týǵanyna 115 jyl tolýyna oraı Ulttyq ulan bólimshelerinde áskerı-patrıottyq rýhty nyǵaıtýǵa, tarıhı jadty saqtaýǵa, jas áskerı qyzmetshiler arasynda qaharmannyń ónegesin keńinen nasıhattaýǵa baǵyttalǵan eske alý, tárbıelik, aqparattyq is-sharalar uıymdastyryldy. Qazir Baýyrjan Momyshulynyń «Soǵys psıhologııasy» men «Ushqan uıa» eńbekteri quqyqtyq tártip áskerlerindegi memlekettik-quqyqtyq, jaýyngerlik daıarlyqtyń rýhanı-tájirıbelik negizine aınaldy. Al Ulttyq ulan sapynda Baýyrjan esimdi júzdegen ulandyqtyń qyzmet etýi – áskerı dástúrlerdiń sabaqtastyǵy men qazaq halqynyń jaýyngerlik dańqy tarıhynda máńgilik oryn alǵan tulǵa murasynyń aıqyn belgisi retinde qabyldanady.
