Depýtat Tımýr Qyryqbaevtyń aıtýynsha, másele tek kásipkerlikti qoldaý sheńberimen shektelmeıdi. Bul qarapaıym azamattardyń kúndelikti turmysyna tikeleı áser etetin júıe. Onyń sózinshe, talqylaý kezinde Úkimettiń qoldaý saıasaty jarııalanǵan maqsattarǵa qanshalyqty sáıkes keletini de suraq astynda qalǵan.
«Talqylaý barysynda Úkimettiń bıznesti sýbsıdııalaý saıasatynyń naqty nátıjesi, onyń jarııalanǵan maqsattarǵa sáıkestigi jáne eń bastysy – bul sharalardyń qarapaıym azamattardyń turmysyna qanshalyqty áser etip otyrǵany jóninde ótkir ári oryndy suraqtar qoıyldy», deıdi depýtat.
Turaqtandyrý qorlarynyń bastapqy maqsaty oryndalmaı otyr
Turaqtandyrý qorlary 2011-2012 jyldary baǵa qubylǵan kezeńde naryqqa jedel aralasý úshin qurylǵan. Negizgi mindet - áleýmettik mańyzy bar azyq-túlik baǵasynyń kúrt ósýine jol bermeý. Alaıda aýdıt nátıjesi bul tetiktiń qazirgi jaǵdaıda tıimdi jumys istemeı otyrǵanyn kórsetken.
Joǵary aýdıtorlyq palatanyń derekterine sáıkes, áleýmettik-kásipkerlik korporasııalardyń baǵany turaqtandyrý prosesine qatysýy naqty nátıje bermegen. Sonyń saldarynan bir jyl ishinde kartop baǵasy shamamen 40 paıyzǵa, pııaz 20 paıyzǵa ósken. Bul júıeli josparlaý men basqarýdyń álsizdigin ańǵartady.
О́nim qoımada, al dúken sóresinde tapshylyq
Eń alańdatarlyq jaıttardyń biri – bıýdjet qarjysyna satyp alynǵan ónimniń halyqqa jetpeı, qoımalarda buzylyp jatýy. Básekelestikti qorǵaý jáne damytý agenttiginiń málimetinshe, sońǵy eki jylda satyp alynǵan ónimniń nebári 19 paıyzy ǵana satylǵan. Qalǵan bóligi 2021 jyldan beri qoımalarda saqtalyp, baǵany turaqtandyrý mindetin atqarmaǵan.
Bul jaǵdaı óńirlerde de kórinis taýyp otyr. Máselen, Qyzylorda oblysynda turaqtandyrý qory qoımalarynda 1,8 mlrd teńgeniń ónimi esepte turǵanymen, áleýmettik dúkenderde et pen sút ónimderi jetispeıdi. Sonymen qatar keıbir óńirlerde bólingen qarjy aınalymnan shyǵarylyp, depozıtterge ornalastyrylǵany anyqtalǵan.
Jańa model qajet
Joǵary aýdıtorlyq palata qazirgi formatta áleýmettik-kásipkerlik korporasııalardyń baǵany turaqtandyrý tetikterine qatysýy oryndy emes ekenin atap ótti. Sebebi ónimdi qashan, qandaı kólemde jáne qandaı jaǵdaıda naryqqa shyǵarý keregi aldyn ala josparlanbaıdy.
Talqylaý qorytyndysynda Májilis depýtattary Úkimetke turaqtandyrý qorlary men áleýmettik-kásipkerlik korporasııalardyń tıimdiligine keshendi baǵa berýdi usyndy. Naryqqa shyǵý ýaqyty, kólemi jáne nátıjesi naqty ólshenetin, ashyq ári túsinikti tetikter engizilýi tıis. Ákimdikter óńirlik erekshelikti eskerip, ómirsheń usynystar ázirleýi qajet.
