«Bir ólke – bir kitap» oblystyq aksııasy 2012 jyldan bastaý alyp, «Ulytaý kitaphanasy» serııasymen jaryq kórgen ádebı eńbekterdi keńinen nasıhattaıdy. Bıyl Saılaýhan Nákenovtiń shyǵarmashylyǵyna arnalǵan 12 túrli mádenı is-shara uıymdastyryldy», dedi Ulytaý oblysynyń mádenıet, tilderdi damytý jáne arhıv isi basqarmasynyń basshysy Maǵjan Tabyldın.
О́leń – júrektiń úni, jýrnalıstıka – azamattyq ún. Qalamyn shyndyq jolyna arnaǵan Saılaýhan Nákenov osy eki ónerdi qatar ustap, halqynyń rýhanııatyna adal qyzmet etken. Onyń shyǵarmasynyń negizgi arqaýy – týǵan jer tarıhy. Týǵan topyraǵyna taban tirep, asqaq taýyna arqa súıegen aqynnyń «Týǵan jer», «Qazaqstan», «Jez dańqy» óleńderin jastar tebirenip jatqa oqydy.
«Saılaýhan Nákenov – poezııada moıyndalǵan aqyn. Oblystyq «Jezqazǵan týy» gazetiniń alǵashqy kúninen sońǵy sátine deıin eńbek etti, ter tókti. «Jezqazǵan týy» basylymynda jıyrma jyl sol kisimen birge jumys istedim. Jaza biletin, sóz túsinetin adamǵa oıyn ashyq aıtatyn. Jezqazǵan qalasynda jas aqyndarǵa arnalǵan «Qurysh» atty ádebı birlestik ashty» dep eske aldy Jazýshylar odaǵynyń Jezqazǵan oblysyndaǵy ókili Batyrbek Myrzabekov.
Aqyn, Jazýshylar odaǵynyń múshesi Ǵazız Eshtanaev S.Nákenovtiń «Ulytaý úni» dep festıval ataýyn qoıyp, ony alǵash uıymdastyrýshynyń biri bolǵanyn, qoǵam qaıratkeri Qaıyrbek Sádýaqasov ekeýi jas daryndy aqyndardy Jezqazǵan pedagogıkalyq ınstıtýtyna emtıhansyz áńgimelesý arqyly qabyldaýǵa yqpal etkenin tilge tıek etti.
Saılaýhan Nákenovtiń «Saryarqa» óleńine Qazaqstannyń eńbek sińirgen ártisi Ǵalym Muhamedın án shyǵarǵan. Osy bir rýhty ándi ánshiniń óz oryndaýynda tyńdap, kórermen bir jelpinip qaldy.
Jergilikti aqyn Musa Tileýov: «Ulytaý aýdanynda rámizder alańy bar. Alańnyń aınalasyn abattandyryp, Ulytaýǵa qatysty tulǵalarǵa músin qoıylsa, solardyń qatarynda «Ulytaý» óleńin jazǵan Saılaýhan Nákenov pen ánin jazǵan Jaqsykeldi Seıilovtiń de músini ornatylsa degen usynysym bar», dedi.
Aıtys aqyny Muqash Seıitqazınov aqynnyń kózi tirisinde «Qudiretti qoldar», «Jumaqtyń joly» atty eki kitabynyń shyqqanyn, olardy ózine qoltańbasymen usynǵanyn eske aldy.
Ulytaý oblysy
