Aqynnyń «Sosıalıstik Qazaqstan» gazetine tuńǵysh jarııalanǵan fotosy men óleńderi. 1945 jyl, 15 tamyz.
Abaı hakimniń týǵanyna 70 jyl (1915), 80 jyl (1925), 90 jyl (1935) tolǵanda jaryq kórgen otandyq basylymdardy sholyp kórdik. Bulardyń eshqaısynda fotosy jarııalanbaǵan.
1945 jyly fashızm talqandalyp, jeńiske jettik. Kúlli halyq qýandy. Osy jyly qazaq úkimeti tarıhta tuńǵysh ret Abaı toıyn, ıaǵnı aqynnyń týǵanyna 100 jyl tolý merekesin ótkizdi.
Aqynnyń osy 100 jyldyq toıynan keıin dana aqynǵa kózqaras túzelip, hakimniń fotosy men jańadan tabylǵan bir top óleńi QK (b) Ortalyq Komıtetiniń resmı organy «Sosıalıstik Qazaqstan» gazetinde jarııalandy.
Bul sýrette dananyń oıly kelbeti barynsha ádemi kórsetilgen. Basynda oıýsyz qara taqııa, ústinde qaýsyrma óńirli jaǵasyz shapan. Ejelgi sopylyq múrıtterdiń ádebine tán oń qolymen shapan óńirin qýsyra ustap, tórt saýsaǵyn syrtyna, bas barmaǵyn ishine alyp, sol qolyn tizesiniń ústine qoıypty.
Jalpy bárimiz bilemiz, Abaıdyń dál osyndaı jeke túsken sýreti joq. Bul foto 1896 jyly eki ulymen birge (Aqylbaı jáne Turaǵul) Semeıde túsken sýretinen alynyp otyr. Fotoǵa tartqan – N.G.Kýznesov eken. Qundy jádigerdi 1941 jyly 6 naýryz kúni Muhtar Áýezov Semeıdegi Abaı mýzeıine tapsyrǵan.
Bul týraly Muhtar Maǵaýın: «1896 jyl. Abaı 51 jasta. Arylmas muń qalypty baıypqa aınalyp, syrttaǵy qaıǵy ishke túsken kez. Oı men syr, sezim men parasat jarastyq tapqan. О́ziniń ólmesin, máńgi jasaryn aıqyn ańdaǵan pánı tirshiligi baqımen astasqan sát», dep sýrettepti.
Semeılik jýrnalıst-zertteýshi Dáýlet Seısenov «Er qazaq» atty kitabynda: «Qandaı bir jumystan syrt qalmaǵan Qaıym aǵa Áýezovtiń usynysymen Abaıdyń 100 jyldyq mereıtoıyn ázirleý jónindegi mereıtoılyq Úkimet komıssııasynyń ǵylymı hatshysy bola júrip, Abaıdyń buǵan deıin málim emes, toǵyz óleńin aınalymǵa qosty. Bul óleńderdiń birnesheýi «Aqynyń jarııalanbaǵan óleńderi» degen taqyryppen jáne aqynyń fotosymen «Sosıalıstik Qazaqstan» gazetiniń 1945 jyldyń 15 tamyz kúngi nómirinde jarııalandy» dep jazady.
Abaıtaný men aqyndy ulyqtaý isinde Qaıym aǵanyń sińirgen eńbegi ushan-teńiz. Avtor «Tarta kór, Semeıimniń topyraǵy» atty eńbeginiń 5-betinde: «Abaıdyń buryn belgisiz bolyp kelgen 9 óleńin taptym. Olar 1945 jyly shyqqan Abaı shyǵarmalarynyń tolyq jınaǵyna endi» dep jazady.
