esimin ulyqtaýdy jerlesteri taǵy bir ıgilikti sharamen atap ótti
Qyzyljardyń quıqaly topyraǵynan ósip-ónip, ádebıettegi ózgege uqsamaıtyn aıshyqty qoltańbasymen jete tanylǵan jerlesterimizdiń biri Safýan Shaımerdenov ekeni esh talas týdyrmaıdy. Maǵjan Jumabaev, Sábıt Muqanov, Ǵabıt Músirepov sekildi taý tulǵaly aǵalarynyń izin basyp, Muqańdaı uly tulǵadan bata alǵan, shynaıylyq pen shyndyqty úılestire bilgen prozalyq shyǵarmalary Memlekettik syılyqtyń laýreaty, Qazaqstannyń halyq jazýshysy marapattarymen, qoǵamdaǵy qaıratkerligi «Otan» ordenimen atap ótilgen kórkem sózdiń kósheli ıesi kózi jumylǵansha týǵan jerge degen perzenttik paryzyn óteýmen boldy.
Sonyń mysqaldaı ǵana bir mysalyna 2014 jyly 24 jeltoqsanda Úkimettiń qaýlysymen esimi berilgen Petropavl qalalyq qazaq gımnazııasynyń jedeldetip salynýyna qosqan eren úlesin aıtsaq ta jetkilikti. 1992 jyly irgetasy qalansa da, qarajattyń jetispeýshiliginen qurylysy toqtap qalǵan ulttyq bilim ordasyna respýblıkalyq vedomstvolardan tıisti aqshany lezde bóldirtken bolatyn. Sóıtip, 320 oryndy gımnazııa 1996 jyly esigin aıqara ashyp, bir myń bala oqıtyndaı dárejege jetti.
Jaqynda osy mekteptiń qabyrǵasyna memorıaldyq taqta ornatyldy. Onda sanaly ǵumyryn Táýelsizdik kúresine arnaǵan aıtýly azamattyń tasqa basylǵan sýreti beınelenip, ataq-marapattary jazylǵan. Memorıaldyq taqtanyń ashylý saltanatynda sóılegen sózinde oblys ákimi Erik Sultanov mundaı ulyqtaý sharalary alda da jalǵasa beretinin jetkizdi. Jıynda qalalyq ardagerler keńesiniń múshesi Aleksandr Lıpovoı, Lıter Medıa baspa úıiniń bas dırektory Saıyn Esmaǵı, Qazaqstan Jazýshylar odaǵy oblystyq uıymynyń tóraǵasy Jarasbaı Súleımenov, L.N.Gýmılev atyndaǵy Eýrazııa ulttyq ýnıversıtetiniń professory, ǵalym Serik Negımov sóz alyp, estelikter aıtty, jyly lebizderin bildirdi. Astanalyq aıtysker aqyn Serikzat Dúısenǵazy «kórkemsózdiń juldyzyn» jyrǵa qosty.
Mártebeli meımandar gımnazııanyń baı murajaıymen tanysty. Jas ónerpazdardyń sóz zergeriniń 1986 jylǵy Jeltoqsan kóterilisi tusyndaǵy birbetkeı, týrashyl minezin somdaıtyn sahnalyq qoıylymyn tamashalady.
О́mir ESQALI,
«Egemen Qazaqstan».
Soltústik Qazaqstan oblysy.
Sýretterdi túsirgen
Talǵat TÁNIBAEV.
