Bıyl «Bolashaq» stıpendııasyn taǵaıyndaý konkýrsynyń erejeleri ózgerdi. Úmitkerler úsh kezeńnen turatyn irikteýden ótedi: keshendi testileý, suhbat jáne Respýblıkalyq komıssııanyń eń joǵary upaı jınaǵan qatysýshylardy irikteýi. Sondaı-aq bir kúntizbelik jyl ishinde konkýrsqa qaıta qatysýǵa bolady. Bul áleýetti úmitkerler qataryn kóbeıtip, olardyń baǵdarlamada baǵyn synap kórýine qosymsha múmkindik usynady.
Konkýrs qorytyndysy boıynsha komıssııa elimizdiń 225 azamatyna halyqaralyq «Bolashaq» stıpendııasyn taǵaıyndaý týraly sheshim qabyldady. Orta eseppen bir orynǵa 4 úmitkerden keldi. Sonymen qatar bıyl sheteldik joǵary oqý oryndary men ǵylymı ortalyqtarǵa qoıylatyn talaptar ózgerdi. Iаǵnı olar mindetti túrde bedeldi halyqaralyq reıtıngterdiń úzdik júzdigine engen bolýy kerek. Bul «Bolashaq» stıpendııasy aıasyndaǵy akademııalyq bilim sapasyn arttyrýǵa jol ashady.
Jańa stıpendıanttardyń 152-si – magıstratýrada, 16-y doktorantýrada oqıdy. Al 57 otandasymyz sheteldik ýnıversıtetter men ortalyqtarda kásibı taǵylymdamadan ótedi.
Buǵan qosa 182 jerlesimiz álemniń jetekshi ǵylymı jáne zertteý ortalyqtarynda taǵylymdamadan ótýge grant aldy. Irikteý sapasyn arttyrý maqsatynda bıyl úmitkerlerge qoıylatyn talaptar kúsheıtildi. Atap aıtqanda, bedeldi basylymdarda ǵylymı maqalalardyń nemese halyqaralyq patentterdiń bolýy mindetti talap retinde qarastyryldy. Sonymen qatar ǵylymı taǵylymdama baǵyttarynyń tizimi Úkimet janyndaǵy Joǵary ǵylymı-tehnıkalyq komıssııanyń basymdyqtaryna sáıkestendirildi.
Otyrysta kelesi jyly kásibı taǵylymdamadan ótýshiler úshin «Jasandy ıntellekt júıesin paıdalanýshylar» degen jańa sanat bekitildi. Ekonomıkanyń túrli salasyn jappaı sıfrlandyrý baǵdary jasandy ıntellekt quzyretterin damytýdy talap etedi. Bul ulttyq ekonomıkanyń básekege qabilettiligin nyǵaıtýdyń ári sıfrlyq transformasııa jaǵdaıynda negizgi salalardy damytýdyń mańyzdy sharty sanalady.
Sondaı-aq jıynda keler jyldan bastap magıstratýra, doktorantýra, taǵylymdama boıynsha atom energetıkasy salasyndaǵy mamandardy daıarlaýǵa baǵyttalǵan arnaıy sanatty engizý týraly sheshim qabyldandy. Jyl saıyn bul baǵytqa 20 kvota bólinedi. Mundaı qadam otandyq atom ónerkásibine qajetti jergilikti bilikti kadrlardy ýaqtyly daıarlaýǵa múmkindik beredi.
Jalpy, jaratylystaný-tehnıkalyq baǵyt boıynsha taǵaıyndalǵan «Bolashaq» stıpendııalarynyń úlesi 2022 jylǵy 59,2 paıyzdan osy jyly 70 paıyzǵa deıin ósti. Injenerlik-tehnıkalyq mamandyqtar boıynsha ǵylymı taǵylymdamalarǵa berilgen stıpendııalar úlesi 2022 jylǵy 46 paıyzdan 72,4 paıyzǵa deıin artty.
Otyrys qorytyndysy boıynsha Memlekettik keńesshi Erlan Qarın «Bolashaq» halyqaralyq stıpendııasyn odan ári iske asyrý jáne jetildirý jóninde naqty tapsyrmalar berdi.
