Turǵyndardyń aıtýynsha, Protozanov kóshesi, №31 úıdiń birinshi podezindegi domofony bar kireberis esik bir aı boıy adamdardy tokpen soǵyp kelgen. Alaıda másele tıisti oryndar tarapynan sheshilmeı, sonyń saldarynan qaıǵyly jaǵdaı oryn alǵan.
«25 jeltoqsanda úlken qaıǵyly jaǵdaı boldy. Jigitti tok qatty soqqany sonsha, ol ushyp ketti. Biz birden jedel járdem shaqyrdyq. Dárigerler kelgen soń reanımasııalyq sharalar júrgizdi, júregi toqtap qalǵan. Jigitti aýrýhanaǵa alyp ketti, qazir jansaqtaý bóliminde.
Buǵan kim jaýap beredi? Nege eshkim eshteńe istemedi, apat bolǵansha kútti me? Bizdiń podezde kóp qart adamdar turady, eger taǵy bireýdi tok ursa, sońy óte aýyr bolýy múmkin», deıdi podezd turǵyndary.
Oqıǵa týraly aqparat qala ákimdigine jetkizildi. Elektr togynyń aǵyp ketý sebepterin anyqtaý úshin oqıǵa ornyna «Istok» kóppáterli turǵyn úıdi basqarý, kútip-ustaý qyzmetkerleri shaqyryldy.
«Elektr togymen zaqymdaný faktisi tirkeldi. Aldyn ala derek boıynsha, tok kózi «Alma domofon» JShS qyzmet kórsetetin uıymǵa tıesili bolýy múmkin. Oqıǵa ornyna turǵyn úı qatynastary bólimi keldi. Qajetti tekserý jáne qalpyna keltirý jumystary júrgizildi.
Sondaı-aq azamattardyń ómiri men densaýlyǵyna tónetin qaýiptiń aldyn alý maqsatynda zaqym keltirgen nysan elektr jelisinen ajyratyldy», dep túsindirdi О́skemen qalasynyń ákimdigi.
Keıinirek elektr togynyń aǵyp ketýine esik mańynda ornatylǵan projektor shamy sebep bolýy múmkin ekeni habarlandy. Ol ajyratylyp, qaýip joıyldy. Oqıǵaǵa qatysty jaýapkershilikti tıisti organdar anyqtaıtyn bolady.
