Foto: gov.kz
17 jeltoqsan kúni Memleket basshysynyń Jarlyǵymen Investorlardyń quqyqtaryn qorǵaý komıteti qurylyp, ınvestısııalyq ombýdsmen fýnksııalary Bas Prokýrorǵa júktelgen edi.
Jańa komıtet ınvestısııalar jáne ınvestısııalyq qyzmet salasynda qadaǵalaý jasap, ınvestorlardyń quqyǵyn qorǵaý, olardyń buzylýynyń aldyn alý jáne jolyn kesý, quqyq buzýshylyqtarǵa yqpal etetin sebepter men jaǵdaılardy anyqtaý jáne joıý syndy mańyzdy mindetterdi júzege asyrady.
Keńeste sóz alǵan Bas prokýror Berik Asylov komıtet zań buzýshylyqtar bolǵannan keıin jazalaý isimen emes olardyń aldyn alý baǵytynda qyzmet etýge tıis ekenin basa aıtty.
«Qadaǵalaý sharalary nysanaly ári aldyn alý sıpatynda bolýy tıis. Bizdiń mindetimiz jazalaý emes, zańsyz sheshimderdiń aldyn alyp, ádilettilikti ýaqtyly qalpyna keltirý», dedi Bas prokýror.
Osy baǵyttaǵy jumystardy tıimdi atqarý úshin «Prokýrorlyq súzgi» tetigi engizilip otyr. Atalǵan tetik engizilgen sátten bastap prokýrorlar 1100 sheshimge qarsylyq tanytyp, 400 tekserý, 480 ákimshilik is júrgizý jáne 210 ózge de shekteý sharalarynyń aldyn aldy. Nátıjesinde azamattyq daýlardyń sany – 32%-ǵa, al ınvestorlardyń sotqa júginýi – 33%-ǵa qysqarǵan.
Qazir Bas prokýratýra men Syrtqy ister mınıstrligi birlesip iri halyqaralyq jáne joǵary tehnologııalyq ınvestorlardy qoldaýǵa baǵyttalǵan «Jasyl dáliz» tetigin iske asyryp jatyr. Bul tetikke 137 ınvestısııalyq joba engizilip, olar boıynsha 16 memlekettik qyzmet kórsetý merzimi 5 jumys kúnine deıin qysqartylǵan.
Búginde prokýrorlar jalpy quny 76 trln teńgeni quraıtyn 1 790 ınvestısııalyq jobany súıemeldeýde. Jalpy somasy 23 trln teńge bolatyn jobalardy iske asyryp jatqan shamamen 2 myń ınvestorǵa naqty quqyqtyq kómek kórsetilgen. Prokýrorlyq qadaǵalaý sharalarynyń nátıjesinde kásipkerlerdiń ákimshilik kedergiler men negizsiz sozbalańǵa tap bolýyna qatysty 145 problemalyq másele sheshilgen. Investorlardyń ótinishterin qaraý kezinde ýaqytty sozyp kedergi keltirgen 326 laýazymdy tulǵa jaýapkershilikke tartylǵan.
