Foto: istockphoto.com
Oqıǵa jeke úıdiń aýlasynda bolǵan. Oqý-aǵartý mınıstrligi Balalardyń quqyqtaryn qorǵaý komıtetiniń málimdeýinshe, jasóspirimder pırotehnıkany eresekterdiń qaraýynsyz paıdalanǵan.
«Zardap shekken balalardyń jaǵdaıy turaqty, ómirine qaýip tónip turǵan joq. Olar aýrýhanaǵa jatqyzyldy», delingen habarlamada.
Bul jaǵdaıǵa baılanysty Komıtet elimizdegi barlyq bilim berý uıymdaryna mereke qarsańynda qaýipsizdik sharalaryn kúsheıtý jáne aldyn alý jumystaryn júrgizý týraly resmı hat joldady. Mamandar bul sharalardyń tıimdiligi ata-analardyń jaýapkershiligine tikeleı baılanysty ekenin atap ótti.
Eldi mekenderde pırotehnıka qoldanýǵa tyıym salynǵanyn este saqtaǵan jón. Eger bul erejeni 16 jasqa tolmaǵan bala buzsa, onyń ata-anasyna 20 AEK (78 myń teńgeden astam) mólsherinde aıyppul salynyp, pırotehnıkalyq buıymdar tárkilenedi.
Oqý-aǵartý mınıstrligi qaýipsizdik erejelerin taǵy da eske salady:
- 18 jasqa tolmaǵandarǵa pırotehnıka satýǵa qatań tyıym salynady;
- Balalarǵa feıerverkterdi óz betinshe qoldanýǵa bolmaıdy, bul tek eresekterdiń baqylaýymen jáne qaýipsiz qashyqtyqta oryndalýy tıis;
- Pırotehnıkany úı ishinde, balkonda jáne turǵyn úılerdiń janynda qoldanýǵa ruqsat etilmeıdi.
