Foto: Ashyq derekkóz
Mahabbattyń sımvolyna aınalǵan erkin dalanyń erke qustaryn alǵash baıqap, foto-vıdeoǵa túsirgen semeılik áriptesimiz Murat Raqymjan. Onyń aıtýynsha, mundaı kórinisti Semeıde buryn-sońdy kórmegen.
– Semeıde turǵanymyzǵa otyz jylǵa jýyqtady. Ertiste júzip júrgen aqqýdy tuńǵysh ret kórýim. Áýelde birqazan shyǵar dep oılappyn. Kameramen jaqyndatyp kórsem – aqqý eken. Muz juqa bolǵan soń jaqyndap baryp jem berýge táýekel ete almadyq. Sodan beri jubaıym ekeýmiz alystan baqylap júrmiz, – deıdi ol.
Murat Raqymjannyń aıtýynsha, qos aqqý jaǵalaýdan qashyqta, Teri zaýyty mańynda, «Parýs» yqshamaýdany tusynda júr. Vıdeoda kórinetin balyqshylar da negizgi arnada emes, toǵan bóliginde otyrǵandyqtan, qaýip tóndirip otyrǵan joq.
Búgin tańerteń habarlasyp, aqqýlardyń háli qandaı ekenin suradyq.
– Keshegi men kórgen aqqý moınyn baýyryna basyp, muz ústinde jatyr. Ekinshisi sýda júzip júr. Álsirep qalǵan jubyna jem izdep júrse kerek. Sálden soń sýdan shyǵyp, sulq jatqan syńarynyń qasyna kelip, túrtinip ıiskegendeı boldy. Serigi basyn kótergen joq. Syńarynyń dármensiz kúıin túsingen qaıran ǵashyq, qubyla jaqqa qaraı bes-alty qadam jasap, moıynyn tómen qaratyp, taǵdyryna bas ıgendeı bolyp, múlgip tur. Ol biz ketkenshe ornynan tapjylǵan joq, – deıdi ol.
Budan soń ózim de baryp, jaǵalaýdan baqylap qaıttym. Rasynda da, qos aqqýdyń biri anda-sanda qanatyn qomdap qozǵalǵanymen, ekinshisi múlde qımylsyz. Qustardyń háli múshkil ekeni anyq baıqalady.
Mamandardyń aıtýynsha, Semeıdegi Bıologııalyq ortalyq mundaı janýardy arnaıy anyqtamasyz qabyldamaıdy.
– Eger eki-úsh kún osylaı otyra berse, ashtyq pen sýyqtan ólip ketýi múmkin. Qazir aqqýlar boıyndaǵy maı qoryn jumsap jatyr. Maı taýsylǵan soń álsireý kúsheıedi. Qutqarý úshin qaıyqpen jaqyndap, jaǵaǵa shyǵarý qajet. Aldymen sábiz týrap bergen durys. Keıin veterınarlar analız alyp, anyqtama jasasa, Bıologııalyq ortalyq qabyldaýy tıis, – deıdi veterınarııa ǵylymdarynyń kandıdaty Ádilqasym Jaqypbaev.
Ǵalymnyń sózinshe, aqqýlar ádette sýdyń saıaz jerinen baldyr men shabaq terip jeıdi. Al sýyq kúsheıip, muz qabyrshyqtanyp qata berse, olardyń jaǵdaıy odan ári qıyndaıdy.
Mine, Semeıde aq jorǵa boran soǵyp tur. Al aldaǵy kúnderde aýa temperatýrasy tómendeıtini týraly habarlamalar kelip jatyr. Aqyn Kákimbek Salyqovtyń sózimen aıtsaq, «Syrǵıdy aqqý aıdynda, syrǵymaıdy, Jaqyn baryp hal-jaıyn kim suraıdy?».
