Gennadıı Golovkın qıyn kezdesýdi nokaýtpen aıaqtap, taǵy bir rekordty qaıtalady
О́tken senbiden jeksenbige qaraǵan tań aldynda qazaqstandyq Gennadıı Golovkın brıtandyq Martın Mıýrreımen WBA jáne IBO versııalary boıynsha orta salmaqtaǵy álem chempıondyǵy úshin kúsh synasyp, 11-raýndta jekpe-jekti taǵy da nokaýtpen aıaqtady. Osylaısha, qatarynan 19 urysty merziminen buryn bitirgen ol ataqty Maık Taısonnyń budan kóp jyl buryn jasaǵan rekordyn qaıtalady.
Eýropanyń bir múıisindegi Monte-Karlonyń Salle des Etoiles arenasynda ótken «Úlken boks keshi» sol sátterde tikeleı efır arqyly «Qazaqstan» telearnasynan kórsetildi. Kesh Astana ýaqyty boıynsha 01:25 saǵatta bastaldy. Al Golovkın men Mıýrreı 04:45 saǵatta rıng tórine kóterildi.
Eske sala ketetin jaıt, bul kúni bir-birimen túıdeı qurdas eki boksshy da 32-shi márte sharshy alańǵa shyqty. Golovkın osyǵan deıingi 31 urysynyń bárinde jeńiske jetip, olardyń 28-in nokaýtpen aıaqtaǵan bolsa, solardyń da 18-inde rıngten merziminen buryn ketken edi. Al Mıýrreı 29 jekpe-jeginde jeńiske jetip, 1 ret teń túsken jáne 1 ret utylǵan bolatyn. Sóıtip, Gennadıı osy shaıqasta óziniń eki birdeı boljam boıynsha chempıondyq ataǵyn qorǵap qana qoıǵan joq, ol sonymen qatar, ataqty Maık Taısonnyń bir kezderi belgilep ketken eń bıik kórsetkishi – qarsylasyn qatarynan 19 ret nokaýtqa jiberý rekordyn da qaıtalap shyqty. Endi kelesi jekpe-jeginde dál osylaı jeńiske jeter bolsa, naǵyz bıik deńgeı bizdiń Golovkınniń enshisine jazylǵaly tur.
Bizdi qýantyp otyrǵany boks áleminde GGG degen nyshandy belgige ıe bolǵan Genanyń kezekti keremet jeńisi ǵana emes. Jeńis óz aldyna, bizdiń baǵlannyń sodan keıingi ózin taǵy da shynaıy qyrynan tanyta bilýi de súısindirmeı qoımas edi.
Qazir áleýmettik jelilerde órip júr, oǵan basqa elderdegi menedjerler men jýrnalıster tarapynan bul joly da kóptegen usynystar túsip jatty. Solardyń biri – Reseıdiń ókilderi ony taǵy da óz memleketteri atynan saıysqa shyǵýǵa kóndirmekke áreket etti. Biraq Gennadıı óziniń baıaǵy aıtqan: «Ákem – orys jigiti, anam – koreı qyzy, al men – qazaqpyn» degen sózinen tanǵan joq.
Endi jekpe-jektiń ózine keleıik. Golovkın onyń basynan Mıýrreıge batyl shabýyl jasaýǵa kóshti. Alǵashqy sekýndtardan onyń shalt shabýyly men tolassyz tegeýrinine tap kelgen qarsylasy ekinshi nómirmen oınaýǵa májbúr boldy. Kezdesýdiń birinshi raýndy bizdiń atlettiń azdaǵan basymdylyǵymen ótti. Kelesi kezeńde de osy kórinis saqtalyp qaldy. Biraq, udaıy alǵa umtylyp, básekelesiniń osal jerlerin múshtiń kúshimen múıizdep taýyp alýǵa beıil qoıǵan qazaqstandyqtyń qarqyny men qýaty birtindep artyp kele jatqany anyq baıqalyp turdy. Munyń qarymyn Mıýrreı ýaqyt uzaǵan saıyn aıqyn sezine bastady. Sondyqtan onyń urys ústinde klınchke barýy jıiledi. Osylaısha Genanyń týra da aýyr soqqylarynan boı tasalamaqshy bolǵan brıtanııalyq boksshynyń qaýqary men qýlyǵynyń qadamy tórtinshi raýndqa deıin ǵana jetti. Kezeń aıaqtalýǵa jaqyn qalǵan sátte qarqynǵa qarqyn qosqan Golovkın kenet qarsylasyn shyrkóbelek aınaldyryp túsirdi. Arada kóp ótken joq, quıyndaı qaýyrt soqqy Mıýrreıdi taǵy da jalpasynan túsirdi. Ony aqyryna deıin jetkizip, dińkeletip tastaýdan gong qana aman alyp qaldy. Besinshi raýnd ta Genanyń osyndaı basymdylyǵymen ótti. Degenmen, Martın bul joly kezekti márte qulap qalmaýdyń amalyn jasaı bildi.
Brıtanııa boksshysy osydan keıin eptep esin jınap alǵandaı boldy. Ol jetinshi raýndta tipti ózi de belsendi shabýylǵa shyǵýǵa táýekel jasady. Bul, álbette, Genaǵa unaǵan joq. Sondyqtan urystyń segizinshi bóliginde ol qarqyndy kúrt arttyryp jiberdi. Kelesi eki raýndta da osy kórinis qaıtalandy. Sonyń bárinde qarsylasyn uryp túsiretin bir ǵana soqqy jetpeı jatqandaı bolyp kórinip turdy. Aqyry onynshy raýndtyń túgesiler tusynda Mıýrreı ushyp tústi. Nokdaýn! Biraq shaıqas jalǵasar-jalǵaspastan gong úni estildi. Al 11-raýndta Golovkınniń qarsha boratqan soqqylarynan keıin esinen aýyp qalǵan adamnyń keıpin tanytqan brıtanııalyqtyń álemtapyryq túrin kórgen tóreshi jekpe-jekti kilt toqtatty. Jeńis!
Osylaısha Gennadıı bıylǵy maýsymdaǵy birinshi urysyn da jeńispen bastady.
Serik PIRNAZAR,
«Egemen Qazaqstan».
