Aqtaý qalalyq ákimdigi bul jaǵdaıdan habardar bolyp shyqty. 29-shaǵyn aýdan 23 turǵyn úıde jylý tasymaldaǵyshtyń temperatýralyq parametrleriniń talapqa saı kelmeýinen páterler jylymaı turǵan kórinedi.
«Bul jaǵdaı shaǵyn aýdannyń jylý jelilerindegi gıdravlıkalyq teńgerimniń buzylýynan bolyp tur. Oǵan qosa, basqa ǵımarattarda qýatty sorǵylar paıdalanylady. Al, atalǵan úıdiń elevatorlyq jylytý júıesi eskirgen. Mundaı máselelerdi sheshý úshin qalada jylý toraptaryn jańǵyrtý baǵdarlamasy júzege asyrylyp jatyr. 26, 27, 28, 28A jáne 29-shaǵyn aýdandarda eski júıeler kezeń-kezeńimen avtomattandyrylǵan júıelerge aýystyrylady. Atalǵan 23 úıde de zamanaýı avtomattandyrylǵan jylý torabyn ornatý josparlanǵan», delingen habarlamada.
Ákimdiktiń málimetinshe, merdiger mekeme atalǵan turǵyn úıde jylytý júıesin retteý jáne turaqtandyrý jumystaryn bastaǵan. 27 jeltoqsanǵa deıin máseleni tolyq sheshý josparlanyp otyr.
