Komıtettiń málimetinshe, 2025 jyldyń aqpan aıynda áıel Aqtóbe qalasyndaǵy avtosalondardyń birinen 2025 jyly shyǵarylǵan avtokólikti 16 490 000 teńgege satyp alǵan. Onyń 8 310 000 teńgesin birden tólep, qalǵan bóligin 7 jyl merzimge nesıege rásimdegen.
Alaıda 2025 jyldyń sáýir aıynyń ortasynan bastap kólikte birqatar aqaýlar anyqtalǵan. Atap aıtqanda, qozǵaltqyshtyń klapan qaqpaǵy tyǵyzdaǵyshy mańynda býlaný, klapan qaqpaǵy astynan maı aǵýy jáne klapan qaqpaǵyn bekitetin bolttyń burandaly bóliginen maı aǵýy tirkelgen.
Satyp alýshy atalǵan máseleler boıynsha resmı dılerge tórt ret júgingenimen, aqaýlar tolyq joıylmaǵan.
Komıtettiń habarlaýynsha, kólikti qaıtarý týraly aýyzsha talaptarǵa avtosalon bas tartyp, avtomobıl tehnıkalyq kúrdeli taýar sanatyna jatady jáne qaıtarylmaıdy dep jaýap bergen.
Komıtet túsindirgendeı, Azamattyq kodekstiń 403-babynyń 5-tarmaǵyna sáıkes, sharttyń eleýli túrde buzylýy jaǵdaıynda zardap shekken tarap keltirilgen shyǵyndy óteýdi talap etýge quqyly. Sonymen qatar «Tutynýshylardyń quqyqtaryn qorǵaý týraly» zańnyń 15-baby 1-tarmaǵynyń 4) jáne 6) tarmaqtaryna saı, tutynýshy taýardy aýystyrýdy nemese shartty buzyp, tólengen aqshany qaıtarýdy talap ete alady.
Komıtet ókilderiniń aıtýynsha, kólik quraldary tehnıkalyq kúrdeli taýarlarǵa jatady. Alaıda eleýli kemshilik anyqtalǵan jaǵdaıda, mundaı talaptar zańdy bolyp esepteledi. Eleýli kemshilik dep joıylmaıtyn, joıý úshin shamadan tys ýaqyt pen qarjy talap etetin nemese tutynýshynyń ómirine, densaýlyǵyna jáne múlkine qaýip tóndiretin aqaýlar tanylady.
Sondaı-aq zańnamaǵa sáıkes, satýshy tutynýshynyń talaptaryn belgilengen merzimde oryndaýǵa, saraptama júrgizý shyǵyndaryn óteýge jáne taýardaǵy kemshilikter úshin, olar týraly bilgen-bilmegenine qaramastan, jaýap berýge mindetti. Satýshyny jaýapkershilikten bosatatyn kez kelgen kelisim zańsyz dep tanylady.
Komıtettiń málimetinshe, avtosalonnyń tutynýshynyń zańdy talabyn oryndaýdan bas tartýy onyń quqyqtarynyń tikeleı buzylýy bolyp sanalady.
2025 jyldyń mamyr aıynda áıel tutynýshylardyń quqyqtaryn qorǵaý departamentine júgingen. Jazbasha talap-aryz joldanǵannan keıin avtosalon kólikti keri qabyldap, satyp alýshyǵa tolyq somany qaıtarǵan. Atap aıtqanda, 8 310 000 teńge qolma-qol tólenip, 8 190 000 teńge bank aldyndaǵy nesıelik mindettemelerdi joıý arqyly qaıtarylǵan.
