Fılm prokattan 1 mıllıard teńgeden astam tabys jınady. Týyndy memleket jumsaǵan qarajatty tolyq qaıtaryp qana qoımaı, ony bes ese arttyrdy. Bul jetistik memlekettik qoldaýdyń nátıjeli bolǵanyn aıqyndap, kórermenniń otandyq kınoǵa degen senimin nyǵaıta tústi. Memleket basshysynyń tapsyrmasy boıynsha QR Mádenıet jáne aqparat mınıstrligi «Kınematografııa týraly» zańǵa ózgerister men tolyqtyrýlar engizý jumystaryn júrgizýde. Bul túzetýler fılmderdi prokatqa deıingi saraptaý rásimin jetildirýge jáne ulttyq fılmderdiń sapasyn arttyrýǵa baǵyttalǵan.
Jyldyń mańyzdy jetistikteriniń biri – «Qazaqfılm» kınostýdııasyna memlekettik qoldaýdyń qaıta jandanýy. Stýdııa qazaq kınosynyń Altyn qoryn qalpyna keltirý sharalaryn jalǵastyrýda.
Sonymen qatar stýdııa ǵımarattaryn jańartý jumystary bastaldy. Sońǵy 15 jylda alǵash ret jóndeý jumystary jekemenshik sektordyń qatysýymen júzege asty. Joba tolyqtaı jeke qarajat esebinen júrgizildi.
Ulttyq kınony qoldaý memlekettik ortalyǵy jarııalaǵan konkýrs nátıjesinde 16 jańa joba jeńimpaz atandy. Olardyń qatarynda tarıhı jáne patrıottyq taqyryptarǵa arnalǵan fılmder bar.
2025 jyly prokatqa 10 otandyq fılm shyqty. Olardyń qatarynda «90+1», «Tarlan», «Igromanka», «Kapıtan Baıtasov», «Qaitadan», «Altyn adam» anımasııalyq fılmi jáne basqa da týyndylar bar.
«Qaitadan» fılminiń rejısseri Dýman Erkimbek memlekettik qoldaýdyń mańyzyn atap ótti.
«Qaitadan» fılmi Aqtaýda ótken «Qorqyt ata» festıvalin ashty. Sonymen qatar Rımde ótken Qazaqstan kınosy aptalyǵynyń birinshi kúni kórsetildi. Budan bólek, men jas rejısserler men prodıýserlerge arnalǵan Shanhaı yntymaqtastyq uıymy baǵdarlamasy aıasynda Qytaıda taǵylymdamadan ótý múmkindigine ıe boldym. Jas býynǵa kórsetiletin memlekettik qoldaý jańa maqsattarǵa jol ashyp, qazaqstandyq kınonyń jańa deńgeıde damýyna múmkindik beredi», dedi ol.
Otandyq «Baýyryna salý», «Shatyrdaǵy ekeý», «Prıanıkı dlıa ee otsa, moego pradeda, ee deda», «Pobedıteleı vıdno na starte» jáne basqa da fılmder AQSh, Reseı, Fransııa, Italııa, Qytaı jáne ózge elderde ótken halyqaralyq kınofestıvalderge usynylyp, 30-dan astam bedeldi marapatqa ıe boldy.
Akter Baqyt Qajybaevtyń jetistigin de erekshe atap ótken jón. Ol ShYU elderiniń kınofestıvalinde «Úzdik akter» nomınasııasyn ıelendi. Festıval Qytaıdyń Chýnsın qalasynda ótti, onda akter «Nabat operasııasy» fılmindegi róli úshin marapattaldy.
Tamyz aıynda Qazaqstan Sındao qalasynda ótken ShYU elderiniń kıno aptalyǵyna qatysty. Baǵdarlamaǵa «Obýchenıe Ademokı» jáne «Aǵaıyndylar» fılmderi endi.
Qazaqstan kınosynyń kúnderi 15-ten astam elde ótti. Atap aıtsaq, Grekııa, Qyrǵyzstan, Albanııa, Fransııa, Norvegııa, Italııa, Chehııa, Japonııa, Túrkııa, Sıngapýr, Ázerbaıjan, Reseı, Belgııa, О́zbekstan jáne basqa da memleketterde otandyq kıno kórsetildi.
