Foto: Ashyq derekkóz
Zeınetaqy men járdemaqylar 10 paıyzǵa ósedi
«2026–2028 jyldarǵa arnalǵan respýblıkalyq bıýdjet týraly» zańǵa sáıkes 2026 jylǵy 1 qańtardan bastap memlekettik járdemaqylardyń barlyq túri, sondaı-aq bazalyq jáne yntymaqty zeınetaqylar Ulttyq bank aıqyndaıtyn ınflıasııanyń boljamdy deńgeıine saı 10 paıyzǵa ósedi.
Bazalyq zeınetaqyny kezeń-kezeńimen arttyrý
Memleket basshysynyń tapsyrmasyna oraı 2023 jyldan bastap bes jyl ishinde bazalyq zeınetaqynyń eń tómengi mólsherin eń tómengi kúnkóris deńgeıiniń 70 paıyzyna deıin, al eń joǵary mólsherin 120 paıyzyna deıin kezeń-kezeńimen arttyrý júzege asyrylyp keledi.
Bazalyq zeınetaqynyń jańa mólsheri
Osyǵan sáıkes 2026 jylǵy 1 qańtardan bastap bazalyq zeınetaqynyń eń tómengi mólsheri 35 596 teńgege jetedi. Bul eń tómengi kúnkóris deńgeıiniń 70 paıyzyna teń. Al eń joǵary mólsheri kúnkóris deńgeıiniń 110 paıyzynan 118 paıyzyna deıin ósip, 60 005 teńgeni quraıdy.
Qańtar aıynda zeınetaqy erte túse me? Mınıstrlik mańyzdy málimdeme jasady
Máselen, 2019 jyly zeınetkerlikke shyqqan 70 jastaǵy azamattyń 2025 jyly bıýdjetten alatyn zeınetaqysy 171 588 teńge boldy. Onyń ishinde bazalyq zeınetaqy 50 851 teńgeni, yntymaqty zeınetaqy 120 737 teńgeni qurady. 2026 jylǵy 1 qańtardan bastap júrgiziletin arttyrýdy eskersek, osy zeınetkerdiń jalpy zeınetaqy mólsheri 192 816 teńgege deıin ulǵaıady. Onyń 60 005 teńgesi bazalyq, 132 811 teńgesi yntymaqty zeınetaqyǵa tıesili. Bul somaǵa Biryńǵaı jınaqtaýshy zeınetaqy qorynan tólenetin qarajat kirmeıdi.
Bala týýyna baılanysty járdemaqylar
2026 jyldan bastap memlekettik járdemaqylardyń ósýine qatysty birqatar ózgeris qarastyrylǵan. Birinshi, ekinshi jáne úshinshi bala týǵan kezde beriletin birjolǵy járdemaqy 149 416 teńgeden 164 350 teńgege deıin artady. Tórt jáne odan da kóp bala týǵan jaǵdaıda bul tólem 247 716 teńgeden 272 475 teńgege deıin ósedi.
Zeınetaqy 10%-ǵa ósedi: 2026 jyly zeınetkerler qansha teńge alady?
Kópbalaly otbasylarǵa qoldaý kúsheıedi
Kópbalaly otbasylarǵa bala sanyna qaraı tólenetin járdemaqy da ulǵaıady. Tórt balasy bar otbasylar 63 030 teńgeniń ornyna 69 330 teńge alady. Al on balasy bar otbasylar úshin tólem mólsheri 157 280 teńgeden 173 000 teńgege deıin kóbeıedi.
Múgedektigi bar azamattarǵa tólemder
Múgedektigi bar azamattarǵa beriletin járdemaqylar da artady. Birinshi toptaǵy múgedektigi bar adamdarǵa tólenetin járdemaqy 101 702 teńgeden 111 872 teńgege deıin, ekinshi toptaǵylarǵa 81 362 teńgeden 89 498 teńgege deıin, úshinshi toptaǵylarǵa 55 474 teńgeden 61 021 teńgege deıin ósedi.
Jańa jylǵa deıin zeınetaqy jınaǵynan qalaı aqsha alyp qalýǵa bolady?
Áleýmettik saqtandyrý qorynan tólemder
Sonymen birge Memlekettik áleýmettik saqtandyrý qorynan tólenetin asyraýshysynan aıyrylý jáne eńbekke qabilettiliginen aıyrylý boıynsha áleýmettik tólemder de 10 paıyzǵa ulǵaıady. Bul tólemder mindetti áleýmettik saqtandyrý júıesine qatysýshylarǵa bıýdjet esebinen beriletin memlekettik járdemaqylarǵa qosymsha tólenedi.
Tólem mólsheri qalaı esepteledi?
Atalǵan tólemderdiń mólsheri ár azamat úshin jeke esepteledi. Ol sońǵy eki jylda Memlekettik áleýmettik saqtandyrý qoryna aýdarylǵan áleýmettik jarnalarǵa, ortasha aılyq tabysqa, eńbekke qabilettiliginen aıyrylý deńgeıine, asyraýyndaǵy adamdar sanyna jáne áleýmettik saqtandyrý júıesine qatysý ótiline baılanysty aıqyndalady.
