Foto: x.com/ZelenskyyUa
Mańyzdy kezdesýden keıin Vladımır Zelenskıı men Donald Tramp baspasóz jıynyn ótkizip, kelissóz barysynda Donbass máselesi sheshimin tappaǵanyn málimdedi. Dese de Aq úı basshysy oń nátıjege jetýge jaqyndaı túskenin aıtty.
«Bul másele áli sheshilgen joq. Biraq biz sheshimge kelýge áldeqaıda jaqyndaı tústik. Bul óte kúrdeli másele. Degenmen men ony sheshetinimizge senimdimin», dedi Tramp.
Tramptyń sózinshe, máselege núkte qoıý úshin 1–2 ǵana suraqtyń sheshimin tabý kerek. Sondaı-aq ol Reseı–Ýkraına arasyndaǵy soǵysty toqtaýǵa múmkindik berse, Ýkraınaǵa barýǵa da ázir ekenin atap ótti.
Al Zelenskıı atalǵan kelissóz aıasynda kóterilgen máseleniń 90%-y sheshimin taýyp, qaýipsizdik kepildigi jónindegi suraq tolyq sheshimin tapqanyn jetkizdi. Eýropa áli de Ýkraına qaýipsizdiginiń basym júgin óz jaýapkershiligine alyp otyrǵanyn aıta ketken jón.
Ýkraına perzıdenti kelisimniń keı tarmaqtary boıynsha referendým ótkizýge qarsy emes ekenine nazar aýdardy.
Tramp beıbit kelisimge kelý prosesi sozylǵan saıyn Ýkraına budan da kóp aýmaqtan aıyrylýy múmkin ekenin de eskertti.
«Ýkraınanyń qazir mámile jasaǵan durys, áıtpese olar kóbirek aýmaǵy men adamdarynan aıyrylady», dedi Tramp.
Kelissóz barysynda AQSh tarapynan Rýbıo, Hegset, Vıtkoff, Kýshner jáne general Keın Ýkraına boıynsha jumys tobyna qosylǵan. Olar beıbit kelisimge kelý maqsatynda Reseımen jumys isteıtin bolady.
Baspasóz barysynda Tramp kelissózge deıin Reseı prezıdenti V.Pýtınmen bir saǵattan astam telefon arqyly sóıleskenin habarlady. Aq úı basshysy áńgimelesý barysynda Reseı basshysy Ýkraınany qalpyna keltirýge kómektesetinin aıtqanyn málimdep, Pýtınniń bul qadamyn «jomart qadam» dep baǵalady.
Buǵan deıin AQSh ókilderi Reseıge baryp, Kremlde 5 saǵatqa jýyq beıbitshilik josparyn talqylaǵan edi.
Al Zelenskıı elde saılaý ótkizýge daıyn ekendigin málimdegen bolatyn.
