«Aýyl – el besigi» baǵdarlamasy aıasynda Kamyshenka eldi mekeninde aýyldyq klýb ashyldy. Kamyshenka aýyly – tirek eldi meken, munda búginde 957 adam turady. Jańa klýb aýyl turǵyndarynyń mańyzdy mádenı-áleýmettik ortalyǵyna aınalyp, 8 adam turaqty jumyspen qamtylady. Balalar men jasóspirimderge arnalǵan shahmat, doıby, toǵyzqumalaq, dombyra, saz aspaptarynda oınaýdy úıretetin úıirmeler jumysyn bastaıdy. Ashylý saltanatyna arnaıy qatysqan oblys ákimi Berik Ýálı:
«Bul aýylda sońǵy ret 1985 jyly jańa ǵımarat retinde mektep salynǵan eken. Sodan beri boı kótergen ǵımarat osy. Bul jerde jaqsy sharalar, konsert, kezdesýler kóptep uıymdastyrylatynyna senemiz. Ǵımarat qurylysy sapaly júrgizilgen eken, qutty bolsyn», deı kelip, nysanǵa jańa mýzykalyq apparattyń sertıfıkatyn tabys etti.
Aýdanda jalpy 33 mádenıet mekemesi, atap aıtqanda, bir aýdandyq, alty aýyldyq mádenıet úıi, tórt aýyldyq klýb, bir aýdandyq, jıyrma bir aýyldyq kitaphana bar.
Sondaı-aq aýdannyń Petropavlovka aýylynda sporttyq saýyqtyrý ortalyǵy ashyldy. Petropavlovka Semeı qalasynan 37 shaqyrym jerde ornalasqan. Eldi mekende qazirde 883 adam turady. Munda da 2000 jyldan beri mádenıet pen sportqa arnalǵan mekeme bolmaǵan eken.
«Nysan qurylysy 2024 jyly bastalyp, bıyl aıaqtaldy. Ǵımarattyń jalpy aýdany – 864 sharshy metr. Bir ýaqytta 300 adamdy qabyldaı alady. Ortalyqtyń ashylýy eldi meken turǵyndary bos ýaqytyn tıimdi ári paıdaly ótkizýge múmkindik beredi. Munda mádenı, rýhanı, sporttyq baǵyttardaǵy túrli úıirmeler ashý josparlanyp otyr. Atap aıtqanda, dombyra, fortepıano, gıtara úıretetin mýzykalyq úıirmeler, sýret salýǵa arnalǵan sabaqtar uıymdastyrylady. Sonymen qatar teatr úıirmesi jumys istep, turǵyndardyń shyǵarmashylyq qabiletin damytady. Aqparattyq tehnologııalar salasyna qyzyǵýshylyq tanytatyndarǵa IT úıirmesi jumys isteıdi. Budan bólek, zııatkerlik damýǵa baǵyttalǵan doıby, shahmat, toǵyzqumalaq úıirmelerin, sondaı-aq voleıbol, basketbol, fýtbol, fıtnes, basqa da sport túrlerinen seksııalar uıymdastyrý kózdelgen», deıdi ortalyq qyzmetkerleri.
Resmı derekterge súıensek, aýdanda 65 sport nysany men 33 sport zaly, sondaı-aq Borodýlıha balalar-jasóspirimder sport mektebinde sport kesheni men stadıon bar. Sporttyń 35 túrinen 414 seksııa turaqty jumys isteıdi. Deneshynyqtyrýmen, sportpen júıeli túrde shuǵyldanatyn barlyq jastaǵy turǵyndar sany 13 014 adamdy quraıdy.
Abaı oblysy,
Borodýlıha aýdany
