Tutastyq pen tatýlyqqa aparar baǵyt

Qoǵam arasynda qyzý talqylanyp jatqan prezıdenttik saılaýdy merziminen buryn ótkizý týraly usynysty jyly qabyldap, mol yqylaspen qoldap otyrǵan óner qaıratkerleri BAQ ókilderine óz málimdemesin jarııa etti. Elimizdiń birqatar óner adamdary Erkin Qasenov, Qýandyq Qystyqbaev, Ǵanı Quljanov, Svetlana Fortýna qatysqan basqosýda tóraǵalyq etken Tuńǵyshbaı Jamanqulov referendým aıasynda birshama aqparattarmen bólisti. «Qazaqstan Respýblıkasy Teatr qaıratkerleri odaǵynyń ujymy prezıdenttik saılaýdy merziminen buryn ótkizý týraly bastamany qoldaıtynyn bildiredi», deı kele, Odaq tóraǵasy Tuńǵyshbaı Jamanqulov búginde til, rýhanııat, dástúr, ulttyq qundylyqtar sııaqty babalardan mıras bolǵan muralardy damytýǵa baǵyt-baǵdar belgilengenin atap kórsetti. Al osynyń aıasynda  asyl muratqa barar jolda «Máńgilik El» ulttyq ıdeıasy boı kóterdi,  ol – Qazaqstan halqyn óziniń baı mádenı murasymen jáne shyǵarmashylyq áleýetimen álemniń eń damyǵan 30 eliniń qataryna kirý maqsatyna qol jetkizýge úndeıdi, degen Odaq tóraǵasy bul rette «Mádenı mura» memlekettik baǵdarlamasy óz jemisin bergendigin aıtyp ótti.  Sondaı-aq, T.Jamanqulov osy turǵyda Odaq qaı kezde de elimizde sahnalyq ónerge qatysty salalardyń damýyna atsalysyp keledi. Qazirgi tańda óner salasy úlken dárejede damyp otyr. Sahna óneriniń damýyna, jalpy mádenıet salasynyń órkendeýine memleket tarapynan udaıy qoldaý kórsetilýde, dedi. Sonymen qatar, álemde jahandyq qarjy-ekonomıka­lyq turaqsyzdyq oryn alǵan jaǵdaıda eldiń tutastyǵy bas­ty qaǵıdalardyń biri, deı kele, osy daǵdarystan súrinbeı ótý – bárimizdiń ortaq mindetimiz ekendigin naqtylady ol. Osynyń aıasynda mundaı kúrdeli ke­zeńderde merziminen buryn pre­zıdenttik saılaý ótkizý bastamasy ýaqyt talaby dep uǵamyz, degen óner qaıratkeri óz sózin bul – erteńin oılaǵan eldiń baıypty qadamy dep bilemiz, dep túıindedi. Elmıra MÁTIBAEVA, «Egemen Qazaqstan». ASTANA.