Isker áıelder ishki turaqtylyq jaǵynda

Qurylǵanyna bıyl 20 jyl bolǵan Qazaqstannyń isker áıelderi qaýymdastyǵy baspasóz máslıhatyn ótkizdi. Qyz Qurtqa men Nazymnyń, Núrıla men Ulpannyń saıyn dalada sar jeliske salyp, shireı tartyp sadaǵyn, atoılap uran salǵanda tik kótergen alashyn esil erlerdiń eńsesin bıiktetýde úr qyzyndaı úrip alǵan kórkimen, salqynda  ósken óleńdeı maıda jibek janymen, ultynyń erteńi úshin  árin de, aqylyn da, baryn da salǵan apalardyń jalǵasy, búgingi ǵasyrdaǵy erkin tynys­ty qazaq qyzy. Qalybynda erin syılap, erteńin oılap, bolashaq urpaǵynyń qamyn jegen sol analar men apalarynyń jalǵasy – Qazaqstannyń isker áıelderi qaýymdastyǵy eldi bir jaǵadan bas, bir jeńnen qol shyǵarýǵa shaqyrdy. Bizder, áıelder úshin otbasy­myzdyń amandyǵy, berekeli tirshiligi, elimizdiń tynyshtyǵy men órkendep damýy – eń mańyzdy másele. Táýelsizdiktiń tańy atqan alǵashqy qıyn kezeńderde belimizdi tas túıin etip býyp, saýdaǵa shyǵyp, táýekel etkenimiz de sondyqtan. Elbasy birde áıelder sol kez­deri otbasylaryn ǵana emes, memleketti de saqtap qaldy degeni bar edi, endeshe bizder, isker áıelder qazirgideı álemdi daǵdarys jeli turyp, shaıqaltyp jatqan tusta da qarap otyra almaımyz. О́zimizdiń azamattyq pozısııalarymyzdy aıqyndap, QHA kótergen bastamany qol­daımyz, degen Qazaqstannyń isker áıelderi qaýymdastyǵynyń Prezıdenttik saılaýdy Raýshan Sársembaeva prezıdent saılaýyn ótkizý ıdeıasynyń  der kezinde kóterilip otyrǵanyn aıtty. «Saılaý bizdiń qoǵamymyzdy tutastyra túsedi, jas úshin de,  jasamys úshin de, aqsaqaldar men aqjaýlyqty ájeler úshin de yrysy mol berekeli tirshilikti, tynyshtyqty saqtap, elimizdi alǵa qaraı órkendetý mańyzdy. О́ıtkeni, ol – bolashaq, erteńgi jarqyn kúnderimizdiń kepili. Al áıelder osyndaı mańyzdy isten tys qalmaıdy», dedi. «Qazirgi ýaqytta istiń basynda, úlken ujymnyń tizginin ustap, basshylyq atqaryp júrgenimizben, bizdiń júregimiz – áıel júregi. Elde bolyp jatqan árbir jaqsy-jamandy oqıǵalardyń barlyǵyn júrek arqyly ótkizý – áıelderdiń jaratylys bergen syıy. Bizdiń oıymyzsha, prezıdenttik saılaýdy bıyl ótkizý jaıynda bastama kóterilýi de osyndaı is. Jáne óte bir ýaqtyly kóterilgen ıdeıa. Ol bárimizdi biriktirip, barlyǵymyzdy bir sanaǵa jınap, jumyldyryp, eldiń jarqyn erteńine bastaıdy, saılaý óziniń asyl mıssııasyn oryndaıdy dep senemin», dedi «Atlant ınjınırıng» JSS bas dırektory Gúlzada О́mirbaı. Al «Avrora NS» JSS dırektory jáne «Tıflıs» meıramhanasynyń qojaıyny Nadejda Seıitova «Áıel – otbasynyń uıytqysy. Ásirese, kúrdeli kezeńde áıel­diń osyndaı qasıetteri aı­qyn kórinedi. Sondyqtan da áıel­der qaýymy Otanymyzda kóte­rilip jatqan saılaýǵa qatysty usynystardy qoldap, óz únderin jetkizýdi paryzdary sanaıdy», dep isker áıelderdiń kóshbasshylary jınalǵan jýrnalısterden osy pikirlerin halyqqa jetkizýdi surady. Iá, ejelden qazaq qyzyn erkeletip, betin ózgelerdeı tum­shalap búrkemelemeı, retti jerinde oıyna da tusaý salmaı erkin ósirgen. Bálkim, ǵasyrlardyń uzyn-sonar, salqar kóshinde keıde báseń, keıde asqaqtaǵan osy rýh táýelsiz eldegi qyzdarymyzdyń boıynan tebindep syrtqa shyǵyp turǵandaı kórinedi. Anar TО́LEÝHANQYZY, «Egemen Qazaqstan». ASTANA.