Bul usynysty táýelsiz Qazaqstannyń tuńǵysh Syrtqy ister mınıstri Tóleýtaı Ysqaquly Súleımenov pen sol kezdegi mınıstrdiń orynbasary Qasym-Jomart Toqaev ta qoldaý kórsetip, 1992 jyldyń kókteminde ál-Farabı atyndaǵy Qazaq ulttyq ýnıversıtetiniń tarıh fakýlteti janynan Halyqaralyq qatynastar bólimi ashyldy. Al «Halyqaralyq quqyq» mamandyǵynyń negizi 1990 jyly zań ǵylymdarynyń doktory, professor M. A. Sarsembaevtyń bastamasymen QazMÝ-diń zań fakýltetinde Halyqaralyq quqyq kafedrasynyń qurylýymen qalandy. Qazaqstan Respýblıkasy Syrtqy ister mınıstrliginiń usynysy negizinde ýnıversıtettiń Ǵylymı keńesiniń 1995 jylǵy 28 sáýirdegi № 88 buıryǵymen Halyqaralyq qatynastar fakýlteti resmı túrde qurylyp, osy saladaǵy alǵashqy kásibı mamandar 1995 jyly Halyqaralyq qatynastar fakýltetin bitirgen bolatyn.
Fakýltettiń qurylýyna professor J. O. Ibrashev tikeleı bastamashylyq jasasa, fakýltettiń alǵashqy dekany bolyp QazMÝ professory Gúljaýhar Shaǵataıqyzy Jambatyrova taǵaıyndaldy. Ol jańa mamandyqtyń ınstıtýsıonaldyq qalyptasýy men ǵylymı-ádistemelik turǵydan damýyna eleýli úles qosty. Onyń basqarýymen jańa fakýltet naǵyz kásibı dıplomatııalyq mektepke aınaldy. Fakýltet qyzmetiniń alǵashqy kúnderinen bastap Qazaqstan Respýblıkasy Syrtqy ister mınıstrliginiń sol kezdegi kásibı dıplomattary – Qasym-Jomart Kemeluly Toqaev, Mıhaıl Ivanovıch Esenalıev, Alekseı Iýrevıch Volkov stýdentterge dıplomatııalyq qyzmet salasyna qatysty pánderden dárister oqydy. Keıinnen elimizdiń kásibı elshileri - Akmaral Haıdarovna Arystanbekova, Áýeshan Maqataevıch Qyrbasov, Murat Týrarovıch Laýmýllın, Qaırat Isaǵalıevıch Isaǵalıev, Alım Shakırovıch Djambýrshın, Nurlan Baıuzaquly Ermekbaev fakýltet stýdentterine ózderiniń dıplomatııalyq tájirıbelerimen bólisip, oqytýshylyq qyzmet te atqardy. 2001 jyldan bastap fakýltettiń quramyna «Halyqaralyq ekonomıkalyq qatynastar» - qazirgi «Álemdik ekonomıka» mamandyǵynyń oqytýshylary men stýdentteri qosyldy. 2002 jyly álem aımaqtaryn júıeli túrde taldaı alatyn, olardyń erekshelikterin, ózara baılanystaryn jáne jahandyq saıasattaǵy rólin keshendi túrde zerdeleıtin «Aımaqtaný» mamandyǵy ashyldy.
Búgingi kúni Halyqaralyq qatynastar fakýlteti úsh dárejeli deńgeıde - bakalavrıat – magıstratýra – PhD fılosofııa doktory negizinde – «Halyqaralyq qatynastar», «Halyqaralyq quqyq», «Álemdik ekonomıka», «Aımaqtaný» jáne «Halyqaralyq qatynastar jáne quqyq salasyndaǵy aýdarma» sııaqty bes bilim berý baǵdarlamalary boıynsha mamandar daıarlaıdy. Birqatar bilim berý baǵdarlamalary aıasynda qos dıplomdyq bilim berý jobasy boıynsha magıstrlerdi daıyndaý maqsatynda kafedra seriktes joǵary oqý oryndarymen, sonyń ishinde Máskeý memlekettik halyqaralyq qatynastar ınstıtýty (MGIMO) men Reseı halyqtar dostyǵy ýnıversıteti (RÝDN) arqyly belsendi yntymaqtastyq júrgizedi.
Fakýltet oqý úderisin ǵylymı-zertteý qyzmetimen biriktirip, ınnovasııany damytyp, ǵylym men bıznestiń úılesimdi baılanysyn qalyptastyrýda. Fakýltettiń ǵylymı-zertteý jumysy professorlyq-oqytýshy quramynyń tereń zııatkerlik áleýetine jáne fakýltettiń iri ǵylymı-zertteý ortalyqtary men ýnıversıtettermen tıimdi halyqaralyq yntymaqtastyǵyna negizdelgen. Osy jyldar ishinde fakýltet AQSh, Ulybrıtanııa, Germanııa, Fransııa, Ispanııa, Italııa, Reseı, Qytaı, Túrkııa, Úndistan, Japonııa, Vengrııa jáne basqa da elderdiń jetekshi ýnıversıtetterimen, Eýropa jáne AQSh-taǵy iri ǵylymı-saraptamalyq ortalyqtarmen, sondaı-aq BUU, EQYU, Eýropalyq Odaq, NATO jáne basqa halyqaralyq uıymdarmen uzaq merzimdi seriktestik ornatty.
Halyqaralyq qatynastar fakýltetinde professor J.O. Ibrashevtiń tóraǵalyǵymen 1997 jyldan bastap «07.00.15 - Halyqaralyq qatynastar jáne syrtqy saıasat tarıhy» mamandyǵy boıynsha kandıdattyq dıssertasııalardy qorǵaý boıynsha dıssertasııalyq keńes jumys istedi. 2003 jyly osy mamandyq boıynsha elimizdegi alǵashqy doktorlyq dıssertasııalardy qorǵaý jónindegi dıssertasııalyq keńes ashyldy. Búgingi zamanaýı talaptarǵa saı fakýltette professor Q.E. Baızaqovanyń tóraǵalyǵymen «Halyqaralyq qatynastar» mamandyǵy boıynsha PhD doktorlyq dıssertasııasyn qorǵaý jónindegi dıssertasııalyq keńes jumys isteıdi.
Fakýltet túlekteri memlekettik qyzmette, dıplomatııada, saıasat pen bıznes salasynda, sondaı-aq halyqaralyq uıymdarda bilikti mamandar retinde tanylyp keledi. Olar QR Syrtqy ister, Ádilet jáne Qorǵanys mınıstrlikterinde, Ulttyq qaýipsizdik komıtetinde, elimizdiń elshilikteri men konsýldyqtarynda, sondaı-aq Prezıdent pen Úkimet apparatynda jáne Qaýipsizdik keńesinde jaýapty qyzmetter atqarýda. Fakýltet túlekteriniń kópshiligi sheteldegi dıplomatııalyq ókildikterde elimizdi laıyqty deńgeıde tanytyp, isker orta men akademııalyq mekemelerde joǵary suranysqa ıe mamandar retinde ýnıversıtettiń, fakýltettiń maqtanyshyna aınaldy. Olardyń kásibı jetistikteri men qoǵamdaǵy orny biz úshin úlken maqtanysh bolyp tabylady.
Búgin biz ótken tarıhty eske alyp, bolashaqqa senimmen qaraımyz. 30 jyldyq tájirıbe – jańa belesterge jol ashqan bastama. Osy jyldar ishinde fakýltet halyqaralyq qatynastar salasynda bilikti mamandar daıarlap, elimizdiń syrtqy saıasaty men jahandyq ıntegrasııasyna aıtarlyqtaı úles qosyp keledi. Aldaǵy ýaqytta da fakýltet óziniń ǵylymı-zertteý jáne bilim berý baǵyttaryn damytyp, jańa jetistikterge jetý arqyly Qazaqstannyń halyqaralyq arenadaǵy bedelin arttyrýǵa at salysa beredi. Sondyqtan biz ótken jetistikterimizdi maqtan tutyp, bolashaqqa úlken úmitpen qaraımyz.
Ál-Farabı atyndaǵy QazUÝ,
Halyqaralyq qatynastar jáne
álemdik ekonomıka kafedrasynyń
professor m.a B.Z.Bıýjeeva
