Foto: ashyq derekkóz
Merekelik túnde jergilikti dámhanalardyń birinen kezekshi bólimge habarlama túsken. Qonaqtardyń biri syrt kıimin kımesten, jalǵyz jeıdemen dalaǵa shyǵyp ketken. Sol ýaqytta aýa temperatýrasy -30 gradýstan tómen túsip turǵan.
Habar túse salysymen polısııa qyzmetkerleri jedel izdeý jumystaryn bastady. Bulandy aýdandyq polısııa bóliminiń jeke quramy dabyl qaǵyp, birneshe kóshe men aýlada bir mezette izdeý júrgizdi. Qatty aıazda jeńil kıingen adamnyń ómirine qaýip tónýi múmkin ekeni polıseılerdi alańdatty.
Izdeý barysynda joǵalǵan azamattyń Shýchınsk qalasynyń turǵyny ekeni jáne merekelik is-sharaǵa kelgeni anyqtaldy. Aldyn ala málimetke sáıkes, ol alkogoldik ishimdik ishkennen keıin baǵdarynan jańylyp, belgisiz baǵytqa ketip qalǵan.
Eki saǵatqa sozylǵan qarqyndy izdeý nátıjesinde er adam aýdan kósheleriniń birinen ábden tońǵan kúıinde tabyldy. Polısııa qyzmetkerleri oǵan alǵashqy medısınalyq kómek kórsetip, jylytyp, jaqyndaryna tapsyrdy.
Keıin qutqarylǵan azamat polıseılerge alǵysyn bildirip, beıneúndeý joldady. Ol ekstremaldy aýa raıy jaǵdaıynda ómirin saqtap qalýǵa polısııa qyzmetkerleriniń jedel áreketi men beıjaı qaramaýy sebep bolǵanyn atap ótti.
