Erkin kúres sheberleri arasynda eń úzdik nátıje Asyljan Esengeldige tıesili. 61 kg salmaqta kúsh synasyp júrgen qandasymyz UWW tiziminde tórtinshi orynda tur. Rasynda da bıylǵy maýsym Asyljan úshin tabysty boldy. Ol birqatar mańyzdy jarysta júlde alyp, Horvatııanyń astanasy – Zagrebte uıymdastyrylǵan álem chempıonatynda qola medaldi moınynda jarqyratty.
92 kg salmaq dárejesindegi Kamıl Krýglıev segizinshi satyǵa jaıǵassa, 70 kg salmaqtaǵy Nurqoja Qaıpanov toǵyzynshy orynǵa turaqtady. Bir keremeti, Nurqojanyń qorjynynda dúnıejúzilik dodanyń tolyq júlde jıyntyǵy bar. Atap aıtsaq, 2019 jyly ol Astanada kúmispen kúptelse, 2024 jyly Tıranada top jardy. Al 2025 jyly Zagrebte qolaǵa qol sozdy. Sondaı-aq Qaıpanovtyń Azııanyń úsh dúrkin chempıony degen ataǵy taǵy bar.
Bıyl grek-rım kúresinen álem chempıony atanyp, Alash jurtynyń talaı jylǵy armanyn oryndaǵan Aıdos Sultanǵalı (60 kg) besinshi oryndy ıelendi. Sońǵy ret «klassıkter» dúnıejúzilik dodada sonaý 1999 jyly daralanǵan edi. Ol kezde Afınada Mkhıtar Manýkıan top jardy. Mine, endi shırek ǵasyrdan asa ýaqyttan keıin Horvatııanyń bas shaharynda Aıdostyń asyǵy alshysynan tústi. Al Mereı Máýletqanov (72 kg) pen Islam Evloev (87 kg) altynshy jáne Álimhan Syzdyqov (130 kg) 10-orynǵa taban tiredi.
Áıelder kúresinen elimizdiń eń úzdik balýany Jámılıa Baqbergenova (72 kg) UWW reıtınginde altynshy orynda tur. Bıylǵy maýsym qazaq qyzy úshin asa sátti boldy deýge kelmes. Sebebi osyǵan deıingi álem chempıonattarynda úsh kúmis pen bir qolany oljalaǵan Jámılıanyń Zagrebten qorjyny bos qaıtty. Al Vıktorııa Hýsaınova (59 kg) toǵyzynshy oryndy enshilese, Elmıra Syzdyqova (76 kg) úzdik ondyqty túıindedi.
