Mamandardyń aıtýynsha, ár bank depozıt mólsherlemesin óz saıasatyna saı belgileıdi. Bul sheshimge Ulttyq bank bekitken bazalyq mólsherleme, ózge bankterdiń usynystary jáne halyqtyń salymdaryn tartý úshin jumsalatyn qosymsha shyǵyndar áser etedi.
Qaı depozıtter boıynsha ósim baıqaldy?
2025 jylǵy 30 jeltoqsandaǵy derekke sáıkes, depozıt naryǵynyń birneshe túrinde paıyz ósken:
-
merzimsiz depozıtter boıynsha mólsherlemeni 2 bank kóterdi;
-
tolyqtyrýǵa bolatyn merzimdi depozıtterde 3 bank ózgeris engizdi;
-
tolyqtyrýǵa bolatyn jınaq depozıtterinde 7 bank ósim jasady;
-
tolyqtyrýsyz jınaq depozıtterinde 5 bank paıyzdy arttyrdy.
Eń joǵary tabystylyq merzimdi jáne jınaq depozıtterde tirkeldi. Keıbir bankter bul salymdar boıynsha jyldyq 20–20,5 paıyz usyna bastady. Mundaı joǵary paıyz, negizinen, 3–6 aıǵa ashylatyn depozıtterge qatysty.
Qazaqstannyń depozıtterge kepildik berý qory túsindirýinshe, bankter aqshany merziminen buryn alý nemese tolyqtyrý shektelgen salymdarǵa joǵary paıyz tóleýge daıyn. Sebebi mundaı qarajat bank úshin turaqty resýrs sanalady.
Merzimsiz depozıtterde ne ózgerdi?
Merzimsiz depozıtter Qazaqstan azamattary arasynda eń keń taraǵan ónim retinde qalyp otyr. Onyń sebebi – aqshany qalaǵan ýaqytta salyp, qajet kezde sheship alý múmkindigi.
Teńge dollardy yǵystyrdy: Depozıttegi ulttyq valıýta úlesi kúrt ósti
2025 jyly bazalyq mólsherleme 15,25 paıyzdan 18 paıyzǵa kóterilgennen keıin bankter bul salym túriniń sharttaryn da qaıta qarady. Jyl basynda eń joǵary paıyz 15 shamasynda bolsa, jeltoqsanda 16,9 paıyzǵa deıin ósti. Naryqtaǵy ortasha mólsherleme 15,3 paıyzǵa jetti. Sonymen qatar mundaı depozıt usynatyn bankter sany artty.
Bankter arasyndaǵy báseke kúsheıdi
Merzimdi depozıtter segmentinde de ózgeris bar. Buryn bul ónimdi 4 bank usynsa, qazir olardyń sany 7-ge jetti. Bir jyl ishinde eń joǵary paıyz 16,7-den 20 paıyzǵa deıin kóterildi.
Jınaq depozıtteri boıynsha da osyndaı úrdis baıqalady. Tolyqtyrýsyz jınaq salymdarynda paıyz 18,5-ten 20,5 paıyzǵa deıin ósti. Jyl sońynda 11 bank depozıtterdiń túrli túri boıynsha 20 paıyzdyq tabys usynyp otyr.
Salymshylarǵa keńes
Mamandar depozıt tańdaǵanda tek joǵary paıyzǵa emes, kelisimshart sharttaryna da nazar aýdarýǵa shaqyrady. Aqshany tolyqtyrý, merziminen buryn sheshý múmkindigi jáne banktiń qarjylyq turaqtylyǵy mańyzdy.
Sondaı-aq kepildendirilgen ótemaqy mólsheri eske salyndy:
-
teńgedegi jınaq depozıtteri – 20 mln teńgege deıin;
-
ulttyq valıýtadaǵy ózge depozıtter – 10 mln teńgege deıin;
-
shetel valıýtasyndaǵy depozıtter – 5 mln teńgege deıin.
Eger bir bankte birneshe depozıt ashylsa, ótemaqy belgilengen shekter aıasynda, biraq jalpy somasy 20 mln teńgeden aspaı tólenedi.
