Foto: dimashnews.com
«Stranger» ataýynyń birneshe maǵynasy
Aǵylshyn tilinen aýdarǵanda «Stranger» ataýy birneshe maǵynany bildiredi, ári olardyń barlyǵy úsh qurlyqty qamtyp, 13 elde kórsetilgen bul aýqymdy shoýǵa mazmundyq turǵydan tolyq sáıkes keledi.
Týrǵa ataý bolǵan án mátinine súıensek, «Jahankez» ataýy eń dál ári maǵynalyq turǵydan ornyqty nusqa ekeni anyq.
Sonymen qatar, sheteldik kóptegen buqaralyq aqparat quraldary bul ataýdy «Beıtanys» dep túsindirip júr. Sebebi týr aıasynda Dımash birqatar elderge alǵash ret bardy.
Dımashtyń óz sózderin eske alsaq, alys teńizder men muhıttardyń ar jaǵyndaǵy bul saparlardyń negizgi maqsaty – týǵan eliniń mádenıetin múmkindiginshe keń aýdıtorııaǵa tanystyrý ekeni aıqyndalady.
Konsertterdi uıymdastyrý jumystary
Sheteldik konsertterdi uıymdastyrý jumystary konsert ótetin ýaqyttan 7–9 aı buryn bastalady. Bul rette qabyldaýshy eldiń zańnamalyq talaptary men mentalıtettik erekshelikteri eskeriledi. Gastroldik quram Qazaqstannan, Ispanııadan, Reseıden, Kýbadan, Germanııadan jáne Qytaıdan attanatyn mýzykanttardan, konsert ákimshilerinen, tehnıkalyq personaldan turady. Bular – óz isiniń kásibı, tájirıbeden ótken mamandary. Al konsert ótetin eldiń ózinde promoýterler men konsert alańy qyzmetkerleri qosylyp, shamamen 200 adamnan quralǵan birtutas komanda qalyptasady.
Konsertten keıin jazylǵan pikirlerdiń birinde: «Dımashtyń muny qalaı júzege asyratyny túsiniksiz, biraq árbir jańa konserti – jańa bir ómir sekildi» delingen. Shynynda da, shoýdaǵy belgili bir sátti atap ótseńiz, jankúıerleri onyń qaı qalada, qaı konsertte bolǵanyn birden aıta alady.
Konsertterinde kóptegen tanymal qonaqtar bolǵan
Úsh jyl ishinde Dımashtyń konsertterinde kóptegen tanymal qonaqtar boldy. Qabyldaýshy eldiń qurmetti qonaqtary retinde Halýk Levent, Sıtı Nýrhalıza, Býrak Ieter óner kórsetti. Neıtan Vangpen birge Dımash alǵash ret sahnada Djekı Channyń «Avangard» fılminiń saýndtregi – «Happy» ánin usyndy. Renat Gaısınmen birge «Qaıran elim» kompozısııasy arqyly kórermendi kúrdeli tarıhı estelikter álemine jeteledi. Al Madison Square Garden sahnasynda Ýolter Afanasev «Love’s not over yet» ánin oryndap, ártiske súıemel jasady.
Dımashtyń avtorlyq ánderi de shyrqaldy
Kóptegen konsertterde kórermender Dımashtyń avtorlyq ánderiniń premerasyna kýá boldy: Almatyda – «The Story of One Sky» jáne «El Amor En Ti», Gonkongta – «When I’ve Got You» men «Smoke», Astanada – «Fire», Nıý-Iorkte – «Samǵaý» jáne «Living For The Game» týyndylary shyrqaldy.
Sondaı-aq, ártis keıbir qalalarda jergilikti tyńdarmandardy qabyldaýshy eldiń tilindegi ándermen qýantty: Erevanda – «Sarerı ovın mernem», Ystambulda – «Gesi Bağlari», Barselona men Mehıkoda – «Besame mucho».
Ol júrekterdi ashady
Ártisti túrli qalalarda birge aralaǵan jankúıerleri Dımash esiminiń ózderine sapar barysynda da kómekteskenin aıtady: taksı júrgizýshileri ánshiniń atyn estı sala qalasy týraly qýana áńgimelesse, qonaqúı ıeleri qıyn sátte qoldaý kórsete bilgen.
Sondaı áserli áńgimelerdiń birinde Pragada qonaqúısiz qalý qaýpi týǵan sátte Dımashtyń esimi kómekke kelgeni týraly anasy men qyzynyń dıalogy keltiriledi: «Myqty eken sizdiń Dımashyńyz, – dedi qyzym, – barlyq esikti ashady».«Ol esikterdi emes, adamdardy, olardyń júrekterin ashady, – dedim men, – al adamdardyń júregin ashý – áldeqaıda qıyn nárse».
Jankúıerler men ártis arasyndaǵy taǵdyrlar men oqıǵalardan órilgen mundaı berik baılanys, sózsiz, mynadaı suraqqa berilgen jaýappen aıqyndalady. «Siz jankúıerlerge qanshalyqty táýeldisiz?» degen saýalǵa álemge áıgili ánshi bylaı degen eken.
«Qarapaıym tilmen aıtqanda – maksımaldy túrde. Kez kelgen ártis úshin, sonyń ishinde men úshin de, kórermensiz bul kásiptiń máni joq ekenin túsinemin. Men neoklassıka janryndaǵy baǵytymdy saqtaı otyryp, ártúrli stılde, túrli baǵytta án aıtamyn. Mýzykamnyń jappaı qalaı qabyldanatynyna asa qatty táýeldi bolýǵa tyryspaımyn, sebebi ol belgili bir deńgeıde ózindik ereksheligi bar mýzyka. Barsha kórermenge meni barlyq iste qoldap júrgenderi úshin alǵys aıtamyn. Meni sizdermen qaýyshtyrǵany úshin Allaǵa myń shúkirshilik aıtamyn», deıdi Dımash Qudaıbergen.
2025 jyly Dımash Qytaı, Qyrǵyzstan, Vetnam sııaqty elderde konsert berip, Almaty men Aqtaýda jerlesterimen kezdesti. Sondaı-aq alǵash ret Afrıka qurlyǵyna – Mysyr eline taban tiredi. Bul – aldaǵy joldyń ashyq ekenin, alda talaı tyń ári mańyzdy sharalardyń turǵanyn bildiredi.
Álemdi baýraǵan daýys nemese ánshi Dımash Qudaıbergenniń ómirindegi tylsym oqıǵalar haqynda
Dımash Qudaıbergen 2025 jylǵy Chehııa hıt-sherýiniń jeńimpazy atandy
Dımash Qudaıbergen týraly «Sheksiz mýzyka» atty kitap jaryqqa shyqty
