Foto: TJM
Osy ýaqytqa deıin Qazaqstannyń ulan-ǵaıyr aýmaǵyna baılanysty árbir óńirde ÝQT (ýltraqysqa tolqyn) radıobaılanys júıesi derbes qalyptasyp keldi. Alaıda tehnıkalyq sheshimderdiń bytyrańqylyǵy men biryńǵaı standarttyń bolmaýy tótenshe jaǵdaılarda bólimshelerdi basqarý tıimdiligin tómendetken edi.
Baılanystyń ornyqtylyǵy men jedeldigine qoıylatyn joǵary talaptar respýblıkalyq deńgeıdegi biryńǵaı ortalyqtandyrylǵan júıeni qurýǵa negiz boldy. Osy maqsatta Tótenshe jaǵdaılar mınıstrligi, Ulttyq Ulan jáne Ishki ister mınıstrligi ókilderinen quralǵan vedomstvoaralyq jumys toby quryldy.
Jańa jeli qalaı jumys isteıdi?
Jumys toby radıoqamtýdyń basym aımaqtaryn, ınfraqurylym obektilerin ornalastyrýdy jáne jobany iske asyrýdyń kezeńdiligin egjeı-tegjeıli pysyqtady. Jyl boıy júrgizilgen montajdaý jumystarynyń nátıjesinde negizgi eldi mekender men basty kólik baǵyttary biryńǵaı radıojelige biriktirildi.
«Qabyldanǵan sheshimderdiń qorytyndysy boıynsha elimizdiń barlyq óńirleri biryńǵaı radıojelisine biriktirildi. Bul júıeni odan ári keńeıtýge, onyń ishinde shalǵaıdaǵy aýdan ortalyqtary men jetýge joly qıyn aýmaqtardy qamtýǵa tolyq jaǵdaı jasady», dep habarlady Tótenshe jaǵdaılar mınıstrligi.
Júıeni damytýdyń kelesi kezeńderi de naqty belgilengen:
2026 jyly Astana, respýblıkalyq mańyzy bar qalalar men oblys ortalyqtarynda turaqty radıosıgnaldy qamtamasyz etý úshin qosymsha bazalyq stansııalar satyp alynady.
SmartOne dıspetcherlik platformasyn qoldana otyryp, aýdandyq bólimshelerdiń retranslıatorlaryn trankıngtik jelige biriktirý josparlanǵan. Bul shalǵaıdaǵy nysandarda, avtojoldar men orman alqaptarynda sapaly baılanys ornatýǵa múmkindik beredi.
Damýdyń mańyzdy kezeńi – HyTalk kommýtasııalyq jabdyǵyn paıdalaný. Bul tehnologııa trankıngtik jelilerdi, 3G/4G/LTE keń jolaqty jelilerin jáne Internetti biryńǵaı kommýnıkasııalyq keńistikte toǵystyrady.
