«El myqty bolsa, el aǵasynan, úı myqty bolsa, bel aǵashynan»

Qazaqstan halqy Assambleıasy Keńesi músheleriniń álemdegi, sondaı-aq, elimizdegi qalyptasyp otyrǵan ekonomıkalyq jaǵdaı­larǵa baılanysty ahýaldy eskere kelip, Qazaqstan Prezıdentin merziminen buryn saılaý týraly jáne bul saılaýda Memleket basshysy Nursultan Nazarbaevqa jańa prezıdenttik mandat berý jaıly úndeýi der kezinde jarııalanyp otyr dep sanaımyn. Ras, qazirgideı dúnıe alasapyran bolyp, daǵdarys degen tajal ár el­diń jaǵasynan alyp jalańdap otyr­ǵanda, halyq oǵan qarsy bola qoımas. Ekinshiden, tórtkúl dúnıede bolyp jatqan soǵys ataýlyny, búlikshilikti kórip, bir kún ash, bir kún toq otyrsaq ta, tynyshtyq ómirdiń baǵasyn bilemiz. Al sol tynyshtyq, beıbit ómirge dáneker bolyp, jarǵaq qulaǵy jastyqqa tımeı, syrttaǵy jáne ishtegi ahýaldy da rettestirip, soǵan uıytqy bolyp otyrǵan kim? Árıne, Elbasy. Al men nege qolymnan kelgenshe Nazarbaevty qoldaımyn? Nege saılaýdyń erte ótýine múddelimin?!. Qazaq aıtady emes pe: «El myqty bolsa, el aǵasynan, úı myqty bolsa, bel aǵashynan» dep. Shyntýaıtyna kelgende, Nazarbaev – bilgir, dana, kóregen, aldyn boljaı alatyn, eshkimdi bólip-jarmaıtyn, barshanyń balasyn baýyryna basqan qazaq bolsa, sol qazaqtyq rýhtaǵy bú­gin­gi tańdaǵy Kóshbasshymyz. Ol birde-bir ulttyń ókilin alala­maı, teńdikte ustap, elimizdegi ynty­maqty, turaqtylyqty, týystyqty, tatýlyqty saqtap, tý etip otyr. Esh ýaqytta elimizdegi dostyq, birlik, yntymaqtyń shekarasy buzylmasyn. Onyń barlyǵyna uıytqy bolyp otyrǵan meniń qazaǵym ekenin eshkim eshqashan umytpaýy kerek. Al sonyń bárin júıege keltirip, uqsatyp, bólmeı-jarmaı ustaǵan Memleket basshysy Nursultan Nazarbaevtyń keremet kemel saıasaty, eren eńbegi. «Halyq Qudaıdan bir jas kishi» degen. Men – el ishin kóp aralap, halyqpen etene aralasyp júrgen adammyn. Eldiń peıilin, pikirin bilemin. Sondyqtan, ha­lyq­tyń pikirimen, halyqtyń oıymen sanasyp, Máńgilik Elimizdiń kóshbasshysyn – Elbasymyzdy osyndaı jolmen saılap alsaq, quba-qup bolar edi.  Asyly OSMANOVA, Qazaqstan halqy Assambleıasynyń múshesi, Qazaqstannyń eńbek sińirgen qaıratkeri. ALMATY.