Alǵash bolyp 2025 jyldyń jazynda 32 jastaǵy Naýryz Muqanǵalıev joǵalǵan. Ol Aqtaý qalasyna jumys izdep ketkennen keıin baılanysqa shyqpaı qalǵan. Týystarynyń aıtýynsha, onyń WhatsApp messendjeri uzaq ýaqyt boıy belsendi bolyp turǵan, alaıda polısııa bul qosylýlardyń telefon arqyly emes, kompıýter arqyly júzege asqanyn anyqtaǵan.
Keıinirek Naýryzdyń ata-anasy men ápkesiniń de habarsyz ketkeni belgili boldy. Úıinde jaryq sónip turǵan, uıaly telefondar tabylmaǵan. Aýladaǵy maldyń bir bóligi WhatsApp arqyly satylyp, túsken qarajat ákesiniń Kaspi Bank-tegi esepshotyna aýdarylǵan. Alaıda bul qarajat keıin paıdalanylmaǵan.
2025 jyldyń qarasha aıynda taǵy bir derek tirkelip, otbasynyń taǵy eki múshesi – Aqbaıan jáne onyń kúıeýi Sultannyń da joǵalyp ketkeni anyqtaldy. Erli-zaıypty sol kúni jolǵa shyǵyp, sodan beri úılerine oralmaǵan. Qazirgi ýaqytta olardyń kámeletke tolmaǵan bes balasy týystarynyń qolynda.
Resmı málimetke sáıkes, atalǵan derek boıynsha qylmystyq is tirkelip, jedel-tergeý toby qurylǵan. Izdestirý sharalaryna Ishki ister mınıstrliginiń qyzmetkerleri de tartylǵan. Barlyq medısınalyq mekemeler, sonyń ishinde jekemenshik klınıkalar tekserilgen. Sonymen qatar uıaly telefon sıgnaldary Qazaqstan aýmaǵynda birneshe ret tirkelip, sońǵysy Shymkent qalasynda anyqtalǵan.
Quqyq qorǵaý organdary respýblıka boıynsha baǵdarlar taratyp, izdestirý jumystaryn jalǵastyrýda.
Qazirgi ýaqytta bir áýlettiń alty adamynyń qaıda ekeni áli belgisiz. Quzyrly organdar olardyń aman-esen tabylýy úshin barlyq qajetti sharalardy qabyldap jatyr.
Buǵan deıin Atyraý oblysynda bir otbasy jumbaq jaǵdaıda joǵalyp ketkeni habarlandy.
