Qazaqstanda kópshiliktiń kúndelikti tirshiligine sińip ketken HQKO bolashaqta túbegeıli ózgeredi. Jasandy ıntellekt jáne sıfrlyq damý vıse-mınıstri Rostıslav Konıashkınniń aıtýynsha, halyqqa qyzmet kórsetý ortalyqtary klassıkalyq «terezelerden» bas tartyp, self-aımaqtar men ózindik qyzmet kórsetý keńistikteri formatyna kóshedi.
Jańa úlgide HQKO qyzmetkerleri qaǵaz qabyldap, anyqtama berýshi emes, keńesshi ári sıfrlyq qyzmetterge baǵyttaýshy ról atqarady. Azamattarǵa memlekettik qyzmetterdi onlaın formatta qalaı alý keregin úıretý – negizgi mindet bolmaq.
«Qoǵam birkelki emes. Bir azamattar qyzmetti áldeqashan qashyqtan alyp júr, al endi bireýler úshin operatordyń kómegi áli de qajet. Sondyqtan transformasııa birden emes, kezeń-kezeńimen júzege asady», dedi vıse-mınıstr.
Onyń sózinshe, qalalarda dástúrli qyzmet kórsetý aımaqtarynyń belgili bir bóligi saqtalady. Bul – sıfrlyq qyzmetterdi ıgere almaı otyrǵan azamattar úshin jasalatyn ótpeli sheshim.
Bıyldan bastap onlaın kórsetiletin memlekettik qyzmetterdiń aýqymy keńeıedi. Jeke kýálikti joǵaltyp alǵan jaǵdaıda qaıta rásimdeý, pasportty alǵash ret alý sekildi mańyzdy qyzmetter tolyqtaı sıfrlyq formatqa kóshedi. Qazir júrgizýshi kýáligin qaıta alý onlaınǵa aýystyrylǵan, al ony alǵash ret alý úshin ótinish tek ınternet arqyly qabyldanady.
