Foto: ashyq derekkóz
Salystyrý úshin aıta keteıik, 2024 jyly múgedektigi bar adamdarǵa ınvataksı qyzmeti 207,2 myń ret kórsetilgen.
Buǵan deıin ınvataksı alý úshin azamattar sapardan bir kún buryn telefon arqyly jazylyp, kólikti uzaq kútýge májbúr bolatyn. Kólik tapshylyǵy men qyzmet kórsetý sapasyna qatysty shaǵymdar da jıi aıtylatyn. Osy olqylyqtardy joıý maqsatynda mınıstrlik ákimdiktermen birlesip, qyzmet kórsetý tetigin jańartý jóninde sheshim qabyldady.
Nátıjesinde suranys túsken sátte qyzmet kórsete alatyn taksı agregatorlaryn tartý jóninde qanatqaqty joba iske qosyldy. Jobanyń basty sharty – sapar qunynan agregator paıdasyna komıssııa ustamaý. Bul bastamaǵa Iаndeks kompanııasy óteýsiz negizde qatysýǵa nıet bildirdi.
Qanatqaqty joba aıasynda azamattar Iаndeks Go mobıldi qosymshasy arqyly ınvataksı qyzmetine tapsyrys bere alady. Qosymsha kólikti jyldam tańdaýǵa, tapsyrys mártebesin onlaın baqylaýǵa jáne saparlar boıynsha monıtorıng júrgizýge múmkindik beredi. Sonymen qatar erekshe qajettilikteri bar jandar júrgizýshige sapar barysynda qajet bolatyn kómekti aldyn ala kórsetýi úshin arnaıy fýnksııa engizilgen. Al júrgizýshilerge jolaýshyny otyrǵyzý jáne túsirý kezinde qalaı kómek kórsetý kerektigi jóninde nusqaýlyq beriledi.
Qazirgi tańda joba Astana men Almatyda múgedektigi bar azamattardan quralǵan fokýs-toptardyń qatysýymen pılottyq rejımde jalǵasyp jatyr. Aldaǵy ýaqytta ınvataksı qyzmetiniń osy jańa formatyn elimizdiń basqa óńirlerine keńeıtý josparlanyp otyr.
