Mańǵystaý oblysynyń ortalyǵyndaǵy shaǵynaýdandardyń birinde túngi ýaqytta er adam soqqyǵa jyǵylǵan. Oqıǵa sáti túsirilgen beınejazba áleýmettik jelilerde tarady. Kadrlarda eki er adamnyń úshinshi bir adamdy kólikten súırep shyǵaryp, jerge qulatyp, qolymen jáne aıaǵymen uryp-soqqany kórinedi.
Mańǵystaý oblystyq polısııa departamentiniń málimetinshe, oqıǵa 7 qańtar kúni saǵat 02:00 shamasynda Aqtaýdyń 38-shaǵynaýdanynda, №11 úıdiń mańynda bolǵan.
Atalǵan derek boıynsha Qylmystyq kodekstiń 293-baby (buzaqylyq) boıynsha qylmystyq is qozǵaldy.
Oqıǵaǵa qatysqandardyń barlyǵy – 17 men 25 jas aralyǵyndaǵy jastar. Shabýyl jasaǵan eki adamnyń biri – 17 jastaǵy kámeletke tolmaǵan. Ekinshi, kámelet jasyna tolǵan kúdikti ustalyp, ýaqytsha ustaý ızolıatoryna qamaldy.
Qazirgi ýaqytta Aqtaý qalalyq polısııa basqarmasynyń tergeý bólimi oqıǵanyń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan tergeý jáne prosessýaldyq is-sharalar keshenin júrgizip jatyr.
