Osy kúnge deıin elimizdiń sportshylary 23 joldamaǵa ıe boldy. Alǵashqy lısenzııalardy mánerlep syrǵanaýshylar jeńip aldy. Byltyrǵy jyldyń kókteminde AQSh-tyń Boston qalasynda jalaýy jelbirgen álem chempıonatynda Mıhaıl Shaıdorov óreli ónerimen tórtkúl dúnıeniń tamsandyryp, kúmis medaldi ıelendi. Sóıtip, alǵashqy joldama ýysymyzǵa tústi. Sofııa Samodelkına bul jarysty 14-orynmen qorytyndylady. Osy nátıjeniń ózi jerlesimizge Apennın túbegine attanýǵa jetkilikti boldy.
Álem kýbogi kezeńinde otandyq short-trekshiler tabysty óner kórsetip júr. Sonyń nátıjesinde elimizdiń tórt sportshysy saıystyń toǵyz túrinen kúsh synasýǵa múmkindik aldy. Olar – Denıs Nıkısha (500, 1000 metr, aralas estafeta), Abzal Ájǵalıev (500 metr, aralas estafeta), Olga Tıhonova (500, 1000, 1500 metr, aralas estafeta), Iаna Han (500, 1500 metr, aralas estafeta). Konkıshilerdiń qorjynynda 11 joldama bar. Erler 500 metrlik qashyqtyqta synǵa túsedi. Áıelderdiń túrli qashyqtyqtarda jeńip alǵan lısenzııalar sany mynadaı: 500 metr – 2, 1000 metr – 2, 1500 metr – 2, 3000 metr – 2, 5000 metr – 1, mass-start – 1, komandalyq iz kesý jarysy – 1 joldama. Bul rette Evgenıı Koshkın, Krıstına Sılaeva, Elızaveta Golýbeva, Nadejda Morozova, Marına Ilıashenkonyń baǵy jandy.
Aldaǵy ýaqytta taǵy birneshe sport túrinen irikteý týrnırleri ótedi. Sol jarystarda qurama qorjyny taǵy birneshe lısenzııamen tolyǵady degen úmit bar. Jalpy, Týrızm jáne sport mınıstrliginiń alǵa qoıǵan jospary – 35 joldama oljalaý.
