Osy oraıda senator Memleket basshysy Qasym-Jomart Toqaevtyń «Eń basty qundylyǵymyz – adam jáne onyń eńbegi. Memleket ár azamattyń eńbek etip, tabys tabýyna, kásibı turǵyda damýyna barlyq jaǵdaıdy jasaýǵa tıis», degen ustanymyn eske saldy.
«Búginde Eńbek mobıldiligi ortalyqtary jumys izdep júrgen azamat pen naqty jumys oryndarynyń arasyndaǵy negizgi kópirge aınaldy. Bul ortalyqtar tek keńes berýmen shektelmeı, adamdarǵa jańa múmkindikter ashyp, ómirin ózgertýge jáne turaqty tabys tabýǵa jol kórsetip otyr», dedi Bıbigúl Jeksenbaı.
Kezdesý barysynda senator mekemeniń qazirgi qyzmetimen tanysyp, elordadaǵy jumyssyzdyq jaǵdaıyna qatysty ózekti aqparat aldy.
Senator sońǵy jyldary Parlament tarapynan jumyspen qamtý jáne eńbek naryǵyn damytýǵa baǵyttalǵan birqatar mańyzdy zańnamalyq ózgerister qabyldanǵanyn atap ótti.
«Atap aıtqanda, halyqty jumyspen qamtý salasyndaǵy zańnamaǵa engizilgen ózgerister arqyly kásibı oqytý, qaıta daıarlaý jáne biliktilikti arttyrý tetikteri keńeıtildi. Al, jumyssyz azamattardy qoldaýdyń quqyqtyq negizderi kúsheıtilip, ataýly áleýmettik kómek pen ýaqytsha jumyspen qamtý sharalary jetildirildi. Sondaı-aq, eńbek resýrstarynyń mobıldiligin arttyrýǵa jáne kadr tapshylyǵy bar óńirlerge jumys kúshin tartýǵa baǵyttalǵan normalar bekitilip, kásipkerlikti bastaýǵa arnalǵan memlekettik granttar men ózin-ózi jumyspen qamtyǵan azamattardy qoldaý tetikteri keńeıtildi. Jumyspen qamtý salasyndaǵy memlekettik qyzmetterdi sıfrlandyrý jáne olardyń qoljetimdiligin arttyrýǵa baǵyttalǵan quqyqtyq sharalar qabyldanyp jatyr», dedi B. Jeksenbaı.
Senatordyń aıtýynsha, bul zańnamalyq ózgerister Eńbek mobıldiligi ortalyqtarynyń rólin kúsheıtip, eńbek naryǵyn adamǵa baǵdarlanǵan, ıkemdi ári tıimdi júıege aınaldyrýǵa múmkindik berdi.
Bıbigúl Jeksenbaı aldaǵy ýaqytta da eńbek jáne jumyspen qamtý salasyndaǵy zańnamany jetildirýde halyqtyń áleýmettik osal toptaryn, jastardy, áıelderdi jáne qaıta daıarlaýdy qajet etetin azamattardy qoldaýǵa basymdyq beriletinin jetkizdi.
