Oqıǵa 7 qańtar kúni Mınnesota shtatynda bolǵan. AQSh-tyń ishki qaýipsizdik mınıstri Krıstı Noemniń resmı nusqasyna sáıkes, polısııa qyzmetkerleri operasııadan keıin keńsege qaıtyp bara jatqanda qyzmettik kóliktiń biri qarǵa batyp qalǵan. Sol sátte agentterdi kúni boıy baqylap júrgen bir top adam aınala jınalyp, olardyń qozǵalysyn bógemek bolǵan. Mınıstrdiń aıtýynsha, Rene Gýd óz kóligin «qarýǵa aınaldyryp», qyzmetkerlerdi qasaqana qaǵýǵa áreket etken. Ol bir saqshyny kóligimen soqqanyn da málimdedi.
Alaıda kýáger túsirgen beınejazbada kólikpen qaqqan sát anyq kórinbeıdi. Vıdeoda ICE qyzmetkeriniń joldy bógep turǵan kóliktiń júrgizýshi esigin ashýǵa umtylǵany, kólik qozǵala bastaǵany, al aldynda turǵan ekinshi agenttiń shetke yrǵyp, sol sátte oq atqany baıqalady.
Ishki qaýipsizdik mınıstrligi bul áreketti «ishki terrorızm aktisi» dep baǵalap, «Polısııa qyzmetkeri óz ómirine, áriptesteriniń jáne turǵyndardyń qaýipsizdigine qater tóngendikten, ózin-ózi qorǵaý maqsatynda qarý qoldandy» dep túsindirdi.
AQSh prezıdenti Donald Tramp ta marqumnyń áreketin «sanaly ári agressıvti» dep sıpattap, polısııa men ICE qyzmetkerlerine radıkaldar kún saıyn qaýip tóndiredi dep málimdedi.
Al Mınneapolıs meri Djeıkob Freı federaldy bıliktiń bul ýájin qatań synǵa alyp, polısııa agentteriniń qaladan ketýin talap etti. Mınnesota shtatynyń gýbernatory Tım Ýolz da federaldy organdardyń túsindirmesin qabyldamaıtynyn aıtty.
Oqıǵany federaldyq tergeý bıýrosy zerttep jatyr.
Marqumnyń anasy Donna Gendjer qyzynyń deportasııaǵa qarsy eshqandaı aksııaǵa qatyspaǵanyn aıtty. Al burynǵy kúıeýiniń sózinshe, sol kúni Rene 6 jastaǵy ulyn mektepke aparyp, birge turatyn azamatymen úıine qaıtyp kele jatqan.
Rene Gýd Vırdjınııa ýnıversıtetin támamdaǵan, ádebıet mamandyǵy boıynsha bilim alǵan. Áleýmettik jelilerde ózin «aqyn, jazýshy, jar jáne ana» dep tanystyrǵan.
Qazir Mınneapolıste jáne Mınnesotanyń ózge qalalarynda tergeý qyzmeti men Tramp ákimshiliginiń saıasatyna qarsy narazylyq aksııalary ótip jatyr. Keıbir mıtıngiler kezinde saqshylar sherýshilerge qarsy burysh gazyn qoldanyp, adamdardy kúshpen yǵystyrǵan.
