Dýbaıda «Ǵazaa» jarysy bastaldy

ASTANA. 24 aqpan. Dýbaıda osymen jetinshi ret uıymdastyrylyp otyrǵan «Fazaa» atty halyqaralyq paralımpıadalyq jarys bastaldy. Qazaqstandyq jeńil atletshilerdiń úsheýi alǵashqy kúni júldeli boldy. Bul týraly Dene múmkindikteri shekteýli tulǵalarǵa arnalǵan sporttyq daıarlaý ortalyǵy habarlady. «Fazaa» atty bul paralımpıadashylar básekesi álemdegi deńgeıi bıik, áıgili jarystardyń biri. Jarys sońynan úzdik sportshylarǵa Halyqaralyq Paralımpıada Komıteti tarapynan «Gran-prı» júldesiniń tabys etilýi de atalmysh básekeniń salmaǵyn aıqyndaı tússe kerek. Aqpannyń 26 juldyzyna deıin jalǵasatyn dúbirli dodada 45-ten astam memlekettiń 500-ge jýyq paralımpıadashylary baq synaýda. Dýbaıǵa Qazaqstannan 34 sportshy attanǵan. Keshe jerlesterimizdiń alǵashqy oljalary týraly súıinshi habar jetti. Qazaqstandyq jeńil atletter alǵashqy kúnnen-aq sýyrylyp alǵa shyǵa bastady. Amanat Qalqaev (sýrette) uzyndyqqa sekirýden qashyqtyqty 5,34-ke jetkizip, ázirge 3-orynǵa taban tiredi. Al Maǵjan Nurlybaev bolsa, 100 metrge júgirýden kúmis júldeni julyp tústi (ýaqyty – 12,07). Dısk laqtyrýdan Alekseı Lýkýtın de bir qola medaldi enshilep úlgerdi (nátıjesi – 16,88 m.). Sóıtip, bizdiń paralımpıadashylar aldaǵy álem chempıonatyna qatysýǵa múmkindik beretin 2 joldamany ıelendi. Joldybaı Bazar. Sýret, derek: Dene múmkindikteri shekteýli tulǵalarǵa arnalǵan sporttyq daıarlaý ortalyǵy.