Májilis depýtattary, AMANAT partııasy fraksııasynyń músheleri Aıgúl Quspan, Sergeı Ponomarev jáne Aıdos Sarym Almaty qalasynyń turǵyndarymen kezdesip, birqatar áleýmettik jáne mádenı nysandardy aralady.
Sapar aıasynda depýtat Aıdos Sarym azamattardy jeke qabyldap, áleýmettik qoldaý, turǵyn úı quqyqtary, medısınalyq kómektiń qoljetimdiligi, dári-dármekpen qamtamasyz etý jáne qalalyq ortany damytý máseleleri boıynsha turǵyndardyń ótinish-tilekterin tyńdady. Kóterilgen máselelerdiń bir bóligine qoldanystaǵy zańnama aıasynda túsindirme berildi, al birqatary qosymsha zerdeleý úshin jumysqa alyndy.
Májilis depýtaty Sergeı Ponomarev Muhtar Áýezov atyndaǵy Qazaq ulttyq drama teatry ǵımaratyna baryp, nysannyń qazirgi jaı-kúıimen jáne rekonstrýksııa barysymen tanysty. Bastapqyda ótken jyldyń qarasha aıynda aıaqtalýy tıis bolǵan jóndeý jumystary qazirgi ýaqytta toqtap tur. Arhıtektýralyq eskertkish sanalatyn ári ulttyq mádenıettiń sımvoly bolyp tabylatyn teatr bıyl 100 jyldyq mereıtoıyn atap ótýde. Depýtat rekonstrýksııany aıaqtaý máselesin respýblıkalyq deńgeıde qaraý qajettigin atap ótti.
– Mundaı nysandar ulttyń mádenı kodyn qalyptastyrady. El úshin mańyzy zor mekemelerdiń uzaqqa sozylǵan qurylys kúıinde qalýyna jol bermeýimiz kerek. Bul másele Májilis deńgeıinde kóteriledi, – dedi Sergeı Ponomarev.
Al Májilis depýtaty Aıgúl Quspan Almaty oblysyndaǵy Ulttyq qaýipsizdik komıteti Shekara qyzmetiniń tehnıkalyq jáne kásiptik oqý bólimshesine bardy. Ol bólimsheniń materıaldyq-tehnıkalyq bazasyn, jeke quramnyń qyzmet etý jáne oqytý jaǵdaıyn, sondaı-aq medısınalyq pýnkttiń jumysyn kórip shyqty. Kezdesý barysynda sanıtarlyq beıindegi mamandardy daıarlaý, áskerı qyzmetshilerdi turǵyn úımen qamtý jáne vedomstvoaralyq ózara is-qımyl máselelerine erekshe nazar aýdaryldy.
– Shekara qyzmetinde de jabdyqtaý, turǵyn úı jaǵdaıy, medısınalyq qyzmet kórsetýge qatysty túıtkilder bar ekenin bilemiz. Olardyń bir bóligi bıýrokratııalyq ári normatıvtik sıpattaǵy máseleler, sondaı-aq memlekettik organdar arasyndaǵy ózara is-qımylǵa baılanysty. Bul máseleler sheshimin tabady. Eń bastysy – shekarashylardyń rýhy, patrıotızmi men kásibıligi, – dep atap ótti Aıgúl Quspan.
Sondaı-aq depýtattar Naýryzbaı aýdanyndaǵy Shuǵyla shaǵyn aýdanynda salynyp jatqan II tıpti órt sóndirý deposynyń qurylysymen tanysty. Nysan AMANAT partııasynyń saılaýaldy baǵdarlamasy aıasynda júzege asyrylýda. Jańa depo órt sóndirý bólimsheleriniń jetý ýaqytyn qysqartyp, qarqyndy damyp kele jatqan aýdan turǵyndarynyń qaýipsizdigin arttyrýǵa múmkindik beredi. Qurylys jumystary josparǵa saı júrgizilip jatyr jáne 2026 jyldyń sońyna deıin aıaqtalýy tıis.
Depýtattardyń aıtýynsha, jedel qyzmetterdiń daıyndyq deńgeıi qala turǵyndarynyń ómir sapasy men jalpy qaýipsizdigine tikeleı áser etedi.
