Foto: 24.kz beınesinen skrınshot
Ulttyq stendke qazaq ádebıetiniń klassıkalyq jáne zamanaýı úlgileri, sondaı-aq eldiń tarıhy men mádenıetin tanytatyn basylymdar qoıyldy. Uıymdastyrýshylardyń aıtýynsha, kórmege baspagerler men aýdarmashylar ǵana emes, Úndistannyń jetekshi ýnıversıtetterinde oqıtyn stýdentter de erekshe qyzyǵýshylyq tanytqan.
Tarıh ǵylymdarynyń doktory Sattar Májıtovtyń aıtýynsha, qazaq tarıhyna degen suranys aıryqsha baıqalǵan.
«Búgingi Delıdegi kórme úndistandyq stýdentter tarapynan úlken qyzyǵýshylyq týdyrdy. Ásirese Delı ýnıversıteti, Djavaharlal Nerý ýnıversıteti, Gandı ýnıversıteti sekildi joǵary oqý oryndarynyń ókilderinen kóp suraq qoıyldy. Olardyń basym bóligi Qazaqstan tarıhyna qatysty boldy. Kórmede el tarıhyna arnalǵan kitaptar, qazaq tilindegi bes tomdyq «Qazaqstan tarıhy», Qazaqstannyń materıaldyq emes mádenı murasy týraly basylym, sondaı-aq Myrza Haıdar Dýlatıdiń eńbekteri usynyldy», deıdi ol.
Úndistandaǵy halyqaralyq kitap jármeńkesi jarty ǵasyrdan astam ýaqyttan beri ótkizilip keledi jáne Azııadaǵy eń iri ádebı alańdardyń biri sanalady. Sonymen qatar bul el álemdik kitap naryǵy boıynsha aldyńǵy úshtikte tur. Osy sebepti mundaı alańǵa shyǵý qazaq ádebıetin halyqaralyq keńistikke tanytýǵa jol ashady.
«24KZ» jarııalaǵandaı, fılolog Aınur Ahmetova sońǵy jyldary qazaq ádebıetiniń aǵylshyn tildi aýdıtorııaǵa júıeli túrde tanystyrylyp kele jatqanyn atap ótti:
«Sońǵy jyldary biz Kembrıdj ýnıversıteti shyǵarǵan eki antologııany usynyp júrmiz. Olarǵa HH-HHI ǵasyrdaǵy qazaq avtorlarynyń shyǵarmalary endi. Biri prozaǵa, ekinshisi poezııaǵa arnalǵan».
Jazýshy Álisher Rahat bolsa kórmede qazaq ádebıetiniń birneshe tilde usynylǵanyn erekshe mańyzdy qadam dep baǵalady.
Nıý-Delıdegi halyqaralyq kitap jármeńkesi 18 qańtarǵa deıin jalǵasady. Qazaqstan ekspozısııasyn ázirleýge Mádenıet jáne aqparat mınıstrligi, Ulttyq kitaphana jáne Qazaqstannyń Úndistandaǵy elshiligi atsalysty. Uıymdastyrýshylardyń pikirinshe, mundaı jobalar sheteldik oqyrmandy qazaq ádebıetimen tanystyryp, elder arasyndaǵy mádenı baılanystardy nyǵaıtady.
