Úzdikter anyqtaldy

«Qansonar» respýblıkalyq ańshylar qoǵam­dyq birlestikteri men ańshylyq sýbektileri qaýymdastyǵy úzdik tabıǵat qoldanýshylaryn tańdap aldy. Qazaqstannyń tabıǵat qoldanýshylary este joq eski zamannan beri janýarlar álemin qorǵaý jolynda kóptegen ádisterdi oılap tapqan. Ańshylyq sharýashylyqtary búginde tabıǵatty taný men ony qoldap, saqtaýdyń mektebi bolyp qana tabylmaı, tabıǵat aıasynda belsendi túrde demalǵysy keletin adamdardyń bas qosatyn orny da bolyp otyr. «Qansonar» respýblıkalyq ańshylar qoǵamdyq birlestikteri men ańshylyq sýb­ek­­tileri qaýymdastyǵy ańshylyq sharýa­shylyqtarynyń jumysyn odan ári jetildire túsý maqsatynda «Úzdik tabıǵat qoldanýshysy» respýblıkalyq konkýrsyn uıymdastyrdy. Bul konkýrs osy saladaǵy jumysty odan ári jańarta túsýge degen yntany arttyra túsedi dep kútilýde. Konkýrs jeńimpazdaryn marapattaý keshe «Nur Otan» partııasy Ortalyq apparatynyń ǵımaratynda ótti. Jeńimpazdardy RA QB men ASA basqarma tóraǵasy Oralbaı Ábdikárimov marapattady. Tabıǵat qoldanýshylary arasyndaǵy konkýrs jeńimpazdaryn erejege saı arnaıy qurylǵan konkýrstyq komıssııa anyqtady. Oǵan «Qansonar» qaýymdastyǵy mamandarynan bólek, basqa sala ókilderi kirdi. Atap aıtar bolsaq, «Qazańshybalyqodaǵy» ZTB dırektory men S.Seıfýllın atyndaǵy Qazaq agrotehnıkalyq ýnıversıteti «Ańshylyq jáne balyq sharýashylyǵy» kafedrasynyń oqytýshysy Nıkolaı Proskýrın  komıssııa múshesi boldy. Konkýrsta birinshi orynǵa «Qostanaı oblystyq ańshylar men balyqshylar qoǵamy» QB ıe boldy. Ekinshi oryn «Temirtaý qalalyq ańshylar men balyqshylar qoǵamy» QB-nyń úlesine tıdi.  Al úshinshi oryndy «Soltústik Qazaqstan oblystyq ańshylar men balyqshylar qoǵamy» QB men «VIP Safari Service» JShS ózara bólisti. Konkýrstyń júlde qoryna keler bolsaq, kelesidegideı somany qamtydy: I orynǵa – bes júz myń teńgeniń, qundy syılyǵy men «Qansonar» qaýymdastyǵy «Úzdik tabıǵat paıdalanýshysy» kýbogy; II orynǵa – úsh júz myń teńgeniń, qundy syılyǵy; III orynǵa –júz myń teńgeniń qundy syılyǵy. «Egemen-aqparat».