Foto: Oqu-agartu ministrligi
Robototehnıka kabınetteri tolyq zamanaýı
Mundaı mektepterde ashylǵan jańa úlgidegi robototehnologııa kabınetteri oqýshylardyń shyǵarmashylyq jáne zııatkerlik áleýetin ashyp, olardyń qalalyqtan bastap halyqaralyq deńgeıge deıingi jarystarda joǵary ári rekordtyq nátıjeler kórsetýine keń múmkindik berip otyr.
«Keleshek mektepterindegi» robototehnıka kabınetteri tolyqtaı zamanaýı formatta jabdyqtalǵan. Munda oqýshylar tek teorııalyq bilimmen shektelmeı, naqty ınjenerlik jobalarmen aınalysyp, tájirıbelik daǵdylaryn jetildiredi. Kabınetterdiń materıaldyq-tehnıkalyq bazasyna LEGO Spike Prime, LEGO Spike Essential, LEGO EV3, WeDo 2.0, Arduino jáne Raspberry Pi platformalary, 3D-prınterler, kvadrokopterler men drondar, REV Robotics jıyntyqtary, sondaı-aq basqa da zamanaýı ınjenerlik qurylǵylar kiredi. Bul múmkindikter oqýshylardyń algorıtmdik oılaýyn, baǵdarlamalaý qabiletin, ınjenerlik daǵdylaryn jáne jobalyq qyzmetin jan-jaqty damytýǵa jaǵdaı jasaıdy. Osyndaı ortada bilim alyp júrgen oqýshylar kúrdeli tehnıkalyq tapsyrmalardy óz betinshe sheshýge, tyń ıdeıalardy usynyp, olardy naqty ınnovasııalyq jobalarǵa aınaldyrýǵa mashyqtanady.
Jańa jyldan bastap «Keleshek mektepteriniń» baǵdarlamasyna dzıýdo úıirmesi engiziledi
Oqýshylar birneshe márte jeńimpaz atandy
«Keleshek mektepteri» ashylǵaly beri sońǵy eki jyl ishinde oqýshylar robototehnıka, dron, STEM, jasandy ıntellekt jáne ınjenerlik baǵyttaǵy baıqaýlardyń belsendi qatysýshylary ǵana emes, birneshe márte jeńimpaz atandy. Mektep komandalary FIRST LEGO League, FIRST Tech Challenge, FIRST Global Challenge, Fibonacci International Robot Olympiad, RoboLand, RoboZerde, Astana FIRST Regional, AI Robotics & Drone, NASA Space Apps Challenge, AEROO Space Settlement Competition, Robowin syndy bedeldi halyqaralyq jáne respýblıkalyq jarystarda júldeli oryndarǵa ıe boldy.
Aıryqsha jetistikter qatarynda halyqaralyq deńgeıdegi altyn, kúmis jáne qola júldeler, sondaı-aq Judges Choice, Innovate Award, Connect Award, Rising All Star, Engineering Excellence Award sekildi arnaıy marapattar bar. Sonymen qatar, oqýshylar Túrkııa, Italııa, BAÁ elderinde ótken halyqaralyq jarystarǵa joldama alyp, dron, gýmanoıd robot jáne ınnovasııalyq jobalar baǵytynda úzdik nátıjeler kórsetti.
