Kezdesýdiń negizgi maqsaty – qoǵamdyq qaýipsizdikti qamtamasyz etýdegi memlekettik organdardyń qyzmetin túsindirý, azamattardyń quqyqtyq mádenıetin arttyrý, sondaı-aq memlekettik organdar men azamattyq qoǵam arasyndaǵy ózara yqpaldastyqty nyǵaıtý.
Is-sharaǵa oblystaǵy arhıv jáne kitaphana qyzmetkerleri, qoǵamdyq kelisim salasynyń mamandary, quqyq qorǵaý organdarynyń ókilderi, sondaı-aq úkimettik emes uıym músheleri qatysty. Kezdesý ashyq dıalog formatynda ótip, qatysýshylar ózderin tolǵandyrǵan suraqtaryn qoıyp, naqty jaýap aldy.
Jıyn barysynda qazirgi qoǵamda ózekti bolyp otyrǵan alaıaqtyqtyń aldyn alý máselesine erekshe nazar aýdaryldy. Sońǵy jyldary telefon jáne ınternet arqyly jasalatyn alaıaqtyq áreketterdiń jıilep ketkeni, ásirese aǵa býyn ókilderiniń jıi aldanyp qalatyny aıtyldy. Osy baǵytta oblystyq prokýratýranyń Qoǵamdyq múddelerdi qorǵaý basqarmasynyń aǵa prokýrory Jalǵas Tólenov túsindirý jumystaryn júrgizip, alaıaqtyqtan saqtaný joldaryna toqtaldy.
Sonymen qatar, Polısııa departamentiniń ákimshilik polısııa basqarmasy bastyǵynyń orynbasary, polısııa podpolkovnıgi Arman Muhametjanuly qoǵamdyq tártipti saqtaý jáne quqyq buzýshylyqtyń aldyn alý baǵytyndaǵy jumyspen tanystyrdy.
Kezdesýde «Amanat» partııasy Ulytaý oblystyq fılıalynyń partııalyq baqylaý jónindegi ınspektory Ershat Aýbakırov azamattyq jaýapkershiliktiń mańyzdylyǵyna toqtaldy. Úkimettik emes uıymdar atynan Ulytaý jastary qoǵamdyq birlestigi tóraǵasynyń orynbasary Baqyt Bolatova azamattyq qoǵamnyń quqyqtyq mádenıetti qalyptastyrýdaǵy róline nazar aýdardy.
Memlekettik quqyqtyq jumys bóliminiń basshysynyń mindetin atqarýshy Quralaı Qalmaǵanbetova zańnamalyq ózgerister men azamattardyń quqyqtaryn qorǵaý tetikteri týraly aqparat berdi.
Osyndaı semınar quqyqtyq saýattylyqty arttyrýǵa, qoǵamdyq qaýipsizdikti nyǵaıtýǵa jáne qoǵamdaǵy turaqtylyqty qamtamasyz etýge oń áser etedi.
