Is-sharaǵa «AMANAT» partııasy fraksııasynyń músheleri Vera Kım, Jarqynbek Amantaı jáne Nurjan Áshimbetov qatysty. Ashyq formatta ótken áńgimede volonterlik jumystyń el ómirindegi orny men ony odan ári damytý tetikteri talqylandy.
Májilis depýtaty, Ulttyq volonterlik jeliniń jetekshisi Vera Kım elimizde eriktilik bir rettik bastama emes, júıeli ınstıtýtqa aınalǵanyn atap ótti. Onyń aıtýynsha, bul baǵyt Memleket basshysynyń tikeleı qoldaýymen damyp keledi.
«Qazaqstandaǵy volonterlik – memlekettiń qoldaýymen júrgiziletin júıeli jumys. Prezıdentimiz volonterlik qozǵalys qoǵamdyq ómirdiń ajyramas bóligine aınalǵanyn birneshe ret atap ótti. Sondyqtan Qasym-Jomart Toqaevtyń bastamasymen BUU Bas Assambleıasy turaqty damý maqsatynda 2026 jyldy Halyqaralyq eriktiler jyly dep jarııalaý týraly qarar qabyldady. Bul – Qazaqstan men bizdiń eriktilerdiń jahandyq ornyqty damýǵa qosqan úlesiniń moıyndalýy», dedi ol.
Vera Kım 2020 jyly Eriktiler jyly jarııalanýy bul salaǵa jańa serpin bergenin, sol kezeńde volonterler qyzmetin retteıtin zańnama aıtarlyqtaı jańarǵanyn eske saldy.
Jarqynbek Amantaıuly «AMANAT» partııasynyń eriktileri el basyna kún týǵan sátterde árdaıym halyqpen birge bolǵanyn aıtty. Ol Ekibastuzdaǵy jylý júıesindegi apat, byltyrǵy sý tasqyny, Qostanaı oblysyndaǵy jáne Abaı oblysyndaǵy orman órtteri kezinde jastardyń aldyńǵy shepte júrgenin mysalǵa keltirdi. Osy jaǵdaılardyń bárinde partııa músheleri zardap shekkenderge kómek kórsetken.
Pavlodar oblysyndaǵy «Jas Ulan» uıymynyń úılestirýshisi Áıgerim Túsipbekovanyń aıtýynsha, búginde óńirdiń barlyq mektebinde volonterlik otrıadtar jumys isteıdi. Olar ekologııalyq aksııalarǵa qatysyp, jalǵyzbasty zeınetkerlerge kómektesedi ári óz bastamalaryn júzege asyrady.
Kezdesýde qoǵamdyq uıymdar volonterler úshin kólik máselesi ózekti ekenin kóterdi. Belsendiler jumyspen nemese oqýmen qatar qoǵamdyq iske aralasatyndyqtan, óńirlik front-ofısterdiń jumys kestesin ıkemdi etý qajet degen usynys aıtyldy.
Depýtattar bul bastamalardy aldaǵy ýaqytta zańnamany jetildirý barysynda qarastyratynyn málimdedi.
Eske salaıyq, keshe Májilis depýtattary, «AMANAT» partııasy fraksııasynyń músheleri Murat Ábenov, Marhabat Jaıymbetov jáne Murat Ergeshbaev Qyzylorda oblysyna jumys sapary kezinde jergilikti «Eko taksı» otandyq servısiniń jumysymen tanysyp, Prezıdenttik saıabaqty qaıta qurý barysyn tekserdi.
