Jetisaı aýdandyq sotynda prokýror týǵan ákesine qatygezdikpen adam tózgisiz qorlyq kórsetken 41 jastaǵy Almas Sadaqbaevty 6 jyl 2 aıǵa bas bostandyǵynan aıyrýdy surady. Oǵan qylmystyq kodekstiń «Qınaý» baby jáne «Densaýlyqqa qasaqana aýyrlyǵy ortasha zııan keltirý» baby boıynsha aıyp taǵylǵan.
Sottalýshynyń ákesi marqum 70 jastaǵy Esirkep Sadaqbaev buǵan deıin ózge balasynyń úıinde turǵan. О́tken jyldyń mamyr aıynda aıyptalýshy ákesin qolyna alǵan. Ákesiniń densaýlyǵy nashar bolǵandyqtan, erekshe kútimdi qajet etken. Aıyptalýshy tamyz aıynyń ózinde ákesine 3 ret fızıkalyq kúsh qoldanyp, asa qatygezdikpen densaýlyǵyna zııan keltirgen. Qarııa kóp uzamaı 2025 jyldyń 2-nen 3-shi qyrkúıegine qaraǵan túni kóz jumǵan.
– Sottalýshy Almas Sadaqbaevty Qylmystyq kodekstiń 110-baby 2-bóligi 1-tarmaǵymen kináli dep tanyp, 4 jyl 8 aı merzimge bas bostandyǵynan aıyrý jazasyn taǵaıyndaýdy, odan bólek Qylmystyq kodekstiń 107-baby 2-bóligi 3-tarmaǵymen kináli dep tanyp, 1 jyl 6 aıǵa bas bostandyǵynan aıyrý jazasyn taǵaıyndaýdy, onsha qatań emes jazany neǵurlym qatań jazaǵa tolyq qosý arqyly túpkilikti 6 jyl 2 aı merzimge bas bostandyǵynan aıyrý jazasyn taǵaıyndaýdy suraımyn, – dedi Shardara aýdanynyń prokýrory Almas Áli.
Jaryssózde sóılegen jábirlenýshiniń zańdy ókili ári sottalýshynyń inisi Batyr Sadaqbaev sottan ákesin qınaǵan aǵasyn jaýapqa tartýdy surady.
Al sottalýshy Almas Sadaqbaev pen onyń qorǵaýshysy jazany jeńildetýdi ótindi. Sadaqbaev kinásin tolyq moıyndap, istegen isine ókinetinin aıtty. Ol buǵan deıin úılengenin, birinshi nekesinen úsh balasy bar ekenin jáne olarǵa alıment tóleıtinin jetkizip, jasaǵan isi úshin baýyrlarymen birge kópshilikten keshirim surady.
15 qańtar kúni saǵat 11:00-de sottalýshynyń sońǵy sózi tyńdalady. Odan keıin is sottyń keńesý bólmesinde qaralyp, sońynan sot aktisi jarııalanady.
