- Qatar astanasy Dohada ústel tennısinen halyqaralyq týrnırdiń tusaýy kesildi. Bul jarysta Lın Shıdýn (Qytaı, álemdik reıtıngte №2), Ýgo Kalderano (Brazılııa, №3), Tomokazı Harımoto (Japonııa, №5), Lıan Szınkýn (Qytaı, №7), Lın Iýn-Chjý (Taıpeı, №9), Kýaı Men (Qytaı, №3), Chjý Iýlın (Makao, №7), Che I (Qytaı, №8), Shın Iýbın (Ońtústik Koreıa, №12) syndy myqtylar baq synaıdy. Parsy shyǵanaǵynda elimizdiń namysyn Eskendir Harkı men Sarvınoz Mirqadyrova qorǵaıdy.
- Asa aýyr salmaqtaǵy qazaqtyń kásipqoı boksshysy Ashat Jantursynov kezekti jekpe-jegin 29 qańtarda Taıland astanasy Bangkokta ótkizedi. Qarsylasy – Apısıt Sangmýang. Taı sportshysy 36 márte rıngke kóterilip, 22 ret jeńiske jetti. 17 básekede aıqyn basymdyq tanytty. 14 ret utylyp, taǵy eki kezdesýde teń esep tirkeldi. Ashat – bazalyq kıkboksshy. Sporttyń osy túrinen Álem kýboginiń ıegeri, Azııanyń eki dúrkin chempıony. Kásipqoı bokstan 11 kezdesý ótkizip, 10 ret mereıi ústem boldy. Toǵyz qarsylasyn esinen tandyrdy. Saǵatbek Musahanovtyń shákirti osydan tórt jyl buryn ázerbaıjandyq Sýrat Garaevtan utyldy. Biraq ashyq aıqasta emes, jaraqat alýyna baılanysty dárigerler oǵan jekpe-jekti jalǵastyrýyna ruqsat bermedi.
- Oktagon promoýsheninde kúsh synasyp júrgender arasynda Eýropanyń eń úzdik aralas jekpe-jek sheberi anyqtalatyn kún jaqyn. Úmitkerler qatarynda Jalǵas Jumaǵulov ta bar. 37 jastaǵy Aqtóbe qalasynyń týmasy «Erkin kúsh» klýbynda óner kórsetedi. Sporttyń osy túrinen mansabyn 12 jyl buryn bastaǵan. 28 márte oktagonǵa shyǵyp, 19 ret jeńis toıyn toılady. 10 básekede aıqyn basymdyq tanytty. 2020–2023 jyldar aralyǵynda Jumaǵulov UFC-de judyryqtasty. Keıinnen Oktagon uıymyna oralyp, chempıondyq belbeýdi ıelendi. Sońǵy jekpe-jegin Jalǵas Pragada chehııalyq Davıd Dvorjakqa qarsy ótkizip, ony merziminen buryn utty. Qazirgi kezde qandasymyz P4P reıtınginde 3-orynda tur. Aldynda tek ırlandııalyq Ýıll Flerı men germanııalyq Kerım Engızek.
