Janýarsyz sırk

Manejde pilder men attar júredi, alaıda olar tiri emes. Bul – tabıǵı kólemde jasalǵan golografııalyq beıneler. Jaryq pen dybys úılesken sátte kórermen olardyń shynaıy qozǵalysyn sezingendeı bolady. Eń bastysy, bul kórinistiń artynda zorlyq ta, májbúrleý de joq.

Sırk basshylyǵynyń aıtýynsha, jańa format janýarlarǵa degen qarym-qatynasty qaıta qaraýǵa baǵyttalǵan. Torlar joǵaldy, al sahnada qııal men tehnologııaǵa keń jol ashyldy. Osylaısha, sırk óneri zamanaýı talaptarǵa saı jańaryp keledi. Al sarapshylar mundaı bastamany mádenıet pen adamgershiliktiń toǵysqan tusy dep baǵalaıdy. Janýarsyz, biraq áserge toly atalǵan sırk formaty kórermenge bir sáttik tańdanystan bólek, oı salýdy da maqsat etedi.

1976 jyly negizi qalanǵan «Circus-Theater Roncalli» – Germanııanyń ǵana emes, búkil Eýropanyń sırk ónerin-
degi aıryqsha qubylys. Ataqty nemis sırk-teatry dástúr men ja­ńa­shyl­dyqty sheber ush­tastyra otyryp, sırk álemine tyń kózqaras ákeldi. Sebebi «Roncalli» – tiri janýarlardan tolyqtaı bas tartyp, olardyń ornyn 3D-gologrammalarmen almastyrǵan álemdegi alǵashqy sırkterdiń biri. Arystan, pil, at sekildi sırk sımvoldary endi kórermenge zamanaýı tehnologııa arqyly, jaryq pen qııalǵa toly beınede usynylady. Bul sheshim sırkti áserli ǵana emes, ekologııalyq ári gýmanıstik óner keńistigine aınaldyrdy.

Sırktiń repertýary klassıkalyq janrlarǵa negizdelgen. Áýede qa­lyqtaǵan akrobattar, sheber jon-g­lerler, kúlki syılaıtyn kloýndarmen qatar «Roncalli» sahnasynda janýarlar kórsetilimi osylaısha jańa tehnologııalarmen baıytylyp, aıryqsha áser qaldyrady.

Kórermen úshin eń basty qundylyqtyń biri – jyly, otbasylyq atmosfera. Sırk aýmaǵynda jármeń­keler uıymdastyrylyp, qala tur­ǵyndary men qonaqtaryna sahna syrtyna ekskýrsııalar ótkiziledi. Munda ár kórermen ózin ertegi ále­mine engendeı sezinedi. Mobıldi formattaǵy «Circus - Theater Roncalli» Germanııa men Aýstrııa qalalaryn turaqty túrde aralap, gastroldik saparmen óner kórsetip keledi. «Torsyz sırk» atty biregeı shoýy – klassıka men bolashaqtyń úılesimin kórsetetin jarqyn mádenı oqıǵa.

Iá, uzaq jyl boıy adam balasy tańdaný úshin janýardy torǵa qamap, úıretip, olardy tabıǵı ortasynan ajyratty. Búgingi qoǵam aıtýly ónerge endi basqa suraq qoıa bastady: tańdanys pen jaýapkershilik qatar ómir súre ala ma? Mine, germanııalyq sırk osy suraqqa óz jaýabyn usynyp otyr. Sebebi «Roncalli» – jaı ǵana sırk emes, qııal, meıirim hám tehnologııa toǵysqan óner merekesi. Janýarsyz sırk úlgisi Eýropada keńinen talqylanyp, bolashaqta bul tájirıbe basqa elderde de qol­danylýy ábden múmkin.