Foto: Ashyq derekkóz
11 myń kórermenge arnalǵan bul arena byltyr «Ordabasy» men «Tobyl» arasyndaǵy Qazaqstan kýboginiń fınalynda ashylǵan bolatyn.
Tengrinews.kz stadıon tekserisine qatysty Týrızm jáne sport mınıstrligine saýal joldaǵan. Ol málimet boıynsha nysan qurylysyna 20,9 mlrd teńge jumsalǵan. Alaıda tamyz aıynda Qyzylorda oblysynyń ákimdigi bul somanyń 26,5 mlrd teńgeni quraıtynyn habarlaǵan.
«Qaısar Arena» stadıonyna ÝEFA ókilderiniń ınspeksııa júrgizýi bıylǵy jyldyń sáýir aıyna josparlanǵan. Mınıstrlik stadıon keminde III halyqaralyq sanatty alady dep úmittenip otyr.
Halyqaralyq sanat tek stadıonnyń sapasyna ǵana emes, qalanyń ınfraqurylymyna da baılanysty beriledi. Onyń ishinde mynadaı mindetti sharttar bar:
- Turaqty halyqaralyq reısteri bar áýejaıdyń bolýy;
- Komandalar men resmı tulǵalarǵa arnalǵan birneshe bes juldyzdy qonaqúı;
- Zamanaýı oqý-jattyǵý bazalary men alańdary.
Qyzylorda oblysy ákimdigi stadıon týraly saıttarǵa shyqqan aqparattar jalǵan ekendigin jetkizdi. Ákimdiktiń málimetinshe, stadıon Qazaqstan fýtbol federasııasy tarapynan lısenzııalanyp, ÝEFA Time baǵdarlamasyna 4-sanattaǵy stadıon retinde engizilgen. Sáıkesinshe, ÝEFA ınspeksııasyn ótkizý sáýir – mamyr aılaryna josparlanǵan.
«ÝEFA málimetine sáıkes, stadıon 4-shi sanatty talapqa tolyqtaı sáıkes keledi. Stadıonnyń oıyn alańy FIFA testileýinen ótip, eń joǵary deńgeı — FIFA QUALITY PRO sertıfıkatyn ıelendi. Osyǵan baılanysty, «Kaysar Arena» stadıonynda iri kólemdegi matchtar men halyqaralyq jarystardy ótkizýge tolyq múmkindik bar. Aıta keteıik, jańa stadıon ÝEFA-nyń resmı saıtynda engizilgen», dep túsindirdi ákimdik.
Eske sala keteıik, «Qaısar Arena» – Qazaqstan táýelsizdik alǵannan beri salynǵan úshinshi stadıon («Astana Arena» men «Túrkistan Arenadan» keıin). Elimizdegi osy úsh jańa arenanyń barlyǵyna da jasandy kógal tóselgen.
