Foto: istockphoto.com
Jańa zańnamalyq tásildiń basty maqsaty – tek iri alpaýyt bankterdiń emes, naryqqa jańadan kelgen qatysýshylardyń da turaqty damýyn qamtamasyz etetin teńgerimdi orta qalyptastyrý. Halyqaralyq tájirıbege súıensek, Reseı, Lıtva, Sıngapýr jáne AQSh-ta shaǵyn bankter úshin jeke bazalyq lısenzııa kózdelgen. Eýropalyq Odaqta, Ulybrıtanııada, Shveısarııada jáne Japonııada biryńǵaı lısenzııa sheńberinde tepe-teń talaptar kózdelgen.
Lısenzııa túrleri ruqsat etilgen operasııalardyń kólemi men retteýshilik talaptardyń qatańdyǵy boıynsha erekshelenedi:
- Shekteýler men talaptar: Zań jobasynda bazalyq banktik lısenzııasy bar bankter úshin aktıvterdiń eń joǵary mólsheri men menshikti kapıtaldyń eń az mólsherine shekteýler belgilenedi. Bul rette naqty shekti mánder zańǵa táýeldi aktilerde aıqyndalady. Qazirgi kezeńde aktıvterdiń mólsherin 500 mlrd teńgege deıin jáne kapıtaldyń eń az mólsherin 10 mlrd teńgege deıin shekteý josparlanǵan. Sonymen qatar mundaı bankterge táýekelderdi azaıtý maqsatynda beırezıdentter men úlestes tulǵalarǵa nesıe berýge tyıym salynady.
- Jeńildetilgen qadaǵalaý: Kishigirim bankter úshin prýdensııalyq normatıvter tómendetiledi. Olardy qadaǵalaý prosesi aıtarlyqtaı jeńildeıdi: jyl saıynǵy tekserýler men eseptilik tapsyrý jıiligi qysqaryp, ınspeksııa júrgizý talaptary jumsarady.
Prezıdenttiń tapsyrmasymen ázirlengen bul zań tek lısenzııalaýdy emes, búkil bank sektorynyń zamanaýı tehnologııalyq ózgeristerge beıimdelýin kózdeıdi. Jańa erejeler ekonomıkany qarjylandyrýdaǵy bankterdiń rólin arttyrýǵa, qarjylyq tehnologııalardy (FinTech) ilgeriletýge jáne sıfrlyq aktıvter aınalymyn erkin túrde damytýǵa baǵyttalǵan.
