Qaırat Tursynqanuly eńbek jolyn Abaı oblysynyń Aıakóz qalasynda qarapaıym bapkerlikten bastady. Sol jaqta júrip, daryndy jastarǵa judyryqtasý óneriniń qyr-syryn úıretti. Keıinnen oblystyń aǵa jattyqtyrýshysy boldy. Sol kezde Semeı óńirinen kóptegen jaqsy boksshylar shyqty. Onyń eńbekqorlyǵy men jumys isteý stıli QFB basshylarynyń kóńilinen shyqsa kerek, kóp uzamaı Q.Sátjanov elimizdiń jasóspirimder, odan keıin jastar quramasyn baptady. Bul rette de nesibesiz bolǵan joq. Qaırattyń komandasy álem, Azııa birinshilikterinde únemi aldyńǵy lekten kórindi.
2021 jyly Tokıo Olımpıadasynda elimizdiń quramasy sátsiz óner kórsetkennen keıin respýblıkamyzdyń bas komandasynyń tizginin Sátjanov ustady. Sol kezde jerlesterimiz Belgradta ótken álem chempıonatynda 5 altyn, 1 kúmis, 3 qola alyp, jalpy komandalyq esepte ekinshi oryndy enshiledi. Kelesi jyly Ammandaǵy Azııa birinshiliginde 3 altyn, 6 kúmis, 3 qola medaldi ıelenip, taǵy da ekinshi satyǵa turaqtady. Biraq Qaıratqa boksshylardy Parıj Olımpıadasyna aparý baqyty buıyrmady. «Densaýlyǵy syr berdi» degen jeleýmen ornynan alyp tastady.
2024 jyly Fransııanyń bas shaharynda jýan judyryqty jigitterimiz el senimin aqtaı almady. Nurbek Oralbaıdan basqa boksshylarymyz tegis utyldy. Dál sol kezde qazaq boksyn tyǵyryqtan shyǵarý maqsatynda Qaırat Tursynqanulyn qaıta qyzmetke shaqyrdy. Tańdaǵan kásibine jan-tánimen berilgen maman ózine júktelgen mindetti abyroıly atqardy. Nátıjesinde, elimizdiń quramasy álem, qurlyq chempıonattarynda zor tabysqa qol jetkizip, qaıta jer-jahandaǵy eń myqty komandalardyń qataryna qosyldy. Q.Sátjanov bas bapker bolǵan jyldary elimizden 7 álem, 43 Azııa chempıony shyqty.
Sport salasynyń tizginin ustap otyrǵan basshylardyń keıbir tirlikterin túsinbeı qalatynymyz bar. Janyn salyp jemisti eńbek etip júrgen mamandardy kez kelgen ýaqytta esh sebep-saldarsyz oryndarynan alyp tastaıdy. QFB taratqan málimetke júginsek, Q.Sátjanovtyń densaýlyǵy kúrt nasharlaǵan. Sport taqyrybyna qalam tartyp júrgen BAQ ókilderin aıtpaǵanda, qarapaıym jankúıerler de olardyń bul ýájine senbedi. Gazet-jýrnaldar, áleýmettik jeli arqyly QFB basshylaryna ókpe-renishterin bildirdi. Onyń aqyry daý-damaıǵa ulasa jazdady. Áıteýir, bári oń sheshilip, kúni keshe Q.Sátjanovtyń jańa qyzmettiń tizginin ustaǵany belgili boldy. Qaırat Tursynqanuly boks federasııasynyń vıse-prezıdenttigine taǵaıyndaldy. Sonymen qosa sol uıymnyń basshysy Shahmurat Mutálip bastaǵan azamattar maıtalman mamanǵa úsh bólmeli páter men Toıota Lend Krýzer kóligin syıǵa tartty.
